02 июля 2011 г.
Чылая пынă çумăрсем хыççăн çанталăк уяртрĕ. Районти ял хуçалăх предприятийĕсем пикенсех уй-хирте тăрăшаççĕ. Июлĕн 1-мĕшĕ тĕлне çум курăксене хирĕç кĕрешсе 7615 гектар çине им-çам сапнă. Çум курăк çывăрмасть. Ку енĕпе çине тăрса ĕçлемелле.
2763 гектар нумай çул ÿсекен курăксем çулнă. Хуçалăхсем 1284 тонна утă хатĕрленĕ. Çак енĕпе «Урожай» колхоз (250 тонна), «Асаново» ял хуçалăх кооперативĕ лайăх ĕçлеççĕ. «Искра» колхозра, Минатуллинăн, Семеновăн фермер хуçалăхĕсенче те типĕ утă пур.
Çанталăка пула нумай çул ÿсекен курăксен ытларах пайне сенаж çине яма тиврĕ. Районĕпе хальлĕхе çак апата 7 пин тонна ытла хатĕрленĕ. Ку енĕпе «Урожай» (1500 тонна), «Труд» (1155 тонна), «Дружба» (1000 тонна) хуçалăхсем ăнăçлă ĕçлеççĕ.
Источник: "Каçал Ен"