02 июля 2011 г.
Июнĕн 25-мĕшĕнче Йĕпреç районĕнчи Пучинке ялĕнче иртнĕ хресчен лашисен тупăшăвне «Урожай» колхозран 5 лаша хутшăннă. Кунта вĕсем тĕрлĕ номинацисенче ăмăртнă. Юлан утçăсен çитĕнĕвĕсем çинчен иртнĕ номерте çырнăччĕ ĕнтĕ. Пуринчен ытларах йывăрăш тиенĕ лава 120 метра туртассипе вара Александр Пыркин тытса пыракан «Спартак» ăйăр финиша чи малтан çитнĕ. «Камай уйĕн урхамахĕсем — 2011» турнирта шурутсен тепĕр лаши те палăрма пултарнă. «Конь-муравей» номинацире Алексей Ложковăн «Ракета» учĕ çав дистанцирех çĕнтерÿçĕ пулнă. Вĕсем иккĕшĕ те йĕркелÿ комитечĕн пĕрремĕш степеньлĕ Дипломне, хаклă парнесене илме тивĕçнĕ.
Редакцирен килмен сăлтавсене пула «Пучинкесем хăнасене яланах тарават» статьяра кайнă тĕрĕсмарлăхшăн шурутсенчен каçару ыйтатпăр.
«Урожай» колхозăн урхамахĕсем республикăра иртекен тĕрлĕ ăмăртусене тăтăшах хутшăнаççĕ, малти вырăнсене йышăнаççĕ. Çак спорт тĕсĕнче шурутсене малашне те ăнăçусем сунатпăр.
Источник: "Каçал Ен"