29 июня 2011 г.
Статистика çирĕплетнĕ тăрăх, çынсем ют çĕр-шывсене çулла ытларах каяççĕ. Сăлтавĕсем вара тĕрлĕрен. Хăшĕ канма каять, тепри — курма, виççĕмĕшĕ вара «юлташ кайнă та, эпĕ те унран юлам мар» тесе...
Унта тухса каяс умĕн чăрмав сиксе ан тухтăр тесен маларах хатĕрленмелле: ют çĕр-шыва çÿремелли паспортăн срокĕ тухман-и, унта улшăнусем кĕртнĕ-и тата ытти те.
2010 çулхи пуш уйăхĕн 1-мĕшĕнчен пуçласа çĕнĕ йышши паспорт илесси вăя кĕни пирки çырса пĕлтернĕччĕ ĕнтĕ. Ăна ют çĕр-шывсене час-часах тухса çÿрекенсем илме пултараççĕ. Паспортра электронлă носитель те пур, çавăнпа ăна 10 çула параççĕ. Кивĕ йышши паспортсем те вăйрах (срокĕ тухман пулсан).
— Паспорт илме çак документсем кирлĕ: анкета, патшалăх пошлинине тÿленине ĕнентерекен квитанци, ĕç кĕнекин копийĕ, тĕрлĕ тĕслĕ 2 сăн ÿкерчĕк, çар билечĕ, РФ гражданинĕн паспорчĕн ксерокопийĕ. Кивĕ йышши паспорта илме ыйтса çырнă заявление ЧФМСăн территори пунктне çитермелле. Унăн адресĕ: Комсомольски ялĕ, Ленин урамĕ, 2-мĕш çурт. Ыйтса пĕлмелли телефон: 5-14-12. Ют çĕр-шыва тухса çÿремелли çĕнĕ йышши паспорт илме Канаш хулине çак адреспа заявлени çырмалла: Ленин проспекчĕ, 12-мĕш çурт. Ыйтса пĕлмелли телефон: 8(83533)2-19-55,— терĕ Арина Вениаминовна, çĕнĕлĕхсене аса илтерсе.
Сăмах май, иртнĕ кунсенче Раççей Федерацийĕн миграци службине йĕркеленĕренпе 19 çул çитнине паллă турĕç. Асăннă службăн районти территори пункчĕн ĕçченĕсем патне савăнăçлă хыпар çитнĕ: ĕçри тăрăшулăхшăн Арина Галкинана РФ миграци службин директорĕ К.Ромодановский «За службу ФМС России» 1 степеньлĕ медаль парса чысланă. Арина Вениаминовнăна ĕçре Алевтина Абржина специалист пулăшать. Туслă йышăн ĕçĕ те кал-кал пырать. Акă кăçал кăна вĕсем ют çĕр-шыва тухса çÿрес кăмăллисене 46 паспорт панă. Çав шутра ачасене — 20.
Украинăна, Абхазие, Кăнтăр Осетие, Кăркăсстан, Казахстан республикисене каяс кăмăллисем çĕр-шывсем хушшинче визăсăр çÿрессипе усă кураççĕ. Çак çĕр-шывсене кайнă чух пĕрле 14 çул тултарман ачасене илес текенсен маларах пирĕн пата пырса ачан çуралнă хучĕ çине Раççей Федерацийĕн гражданлăхне çирĕплетсе пичет ларттармалла. Ют çĕр-шыва кайнă чух чăрмав сиксе ан тухтăр тесен маларах тăрăшмалла.
Источник: "Каçал Ен"