29 июня 2011 г.
Йĕпреç районĕнчи Пучинке ялĕнче çулсеренех «Камай уйĕн урхамахĕсем» турнир ирттересси йăлана кĕнĕ. Унта çак тăрăхра пурăнакансем çеç мар, ытти районсенчи лаша спортне кăмăллакансем те хаваспах хутшăнаççĕ. Асăннă турнира кăçал вун пиллĕкмĕш хут йĕркелерĕç. Спортпа пĕрлех унта юрă-ташă та пулчĕ. Вырăнти художество пултарулăх коллективĕсем, Августа Уляндина тата «Чăваш Ен» ушкăн уява пуçтарăннисене савăнтарчĕç.
Июнĕн 24—25-мĕшĕсенче Пучинке ялĕнче харăсах пысăк пĕлтерĕшлĕ тата икĕ мероприяти пулчĕ. Ял поселенийĕсен командисем республикăри V спартакиадăра тупăшрĕç. Чăваш Енри Муниципалитетсен пуçлăхĕсен кунĕ иртрĕ. Йĕпреçсемпе кÿршĕллĕ пурăннă май, каçалсем те çак мероприятисенчен айккинче юлмарĕç.
«Камай уйĕн урхамахĕсем —2011» турнирта 4 тĕрлĕ ăмăрту пулчĕ: юлан утсем 1330 метра чупасси, тиенĕ урапана вырăнтан хускатса 30, 120 метра куçарасси тата хăнасем хушшинчи «Знаток конного дела» конкурс. Юлан утçăсен ăмăртăвĕнче пирĕн районти Асанкасси, Шурут ялĕсенчен пынă наездниксем те пулчĕç. Вĕсем 2—4-мĕш тапхăрсенче ăмăртăва хутшăнчĕç. 3-мĕш чупура Петр Павлов (Асанкасси), 4-мĕшĕнче Александр Пыркин («Урожай» колхоз) финиша пĕрремĕш çитрĕç. Финала пирĕн районти 3 ут хутшăнчĕ, вĕсем малтан килнине тем пек курас килетчĕ. Шел пулин те, яланах шаннă пек пулса пымасть çав. Петр Павлов (сăн ÿкерчĕкре) «Гордый» урхамахĕпе иккĕмĕш çитрĕ. Сăмах май каласан, çак спорт енĕпе вăл пиллĕкмĕш çул туслă.
Йывăр тиенĕ лавсене 120 метра куçармалли конкурса та хутшăнчĕç шурутсен урхамахĕсем, анчах кунта вĕсем нимĕнпех те савăнтараймарĕç. Ытти çулсенче вара «Урожайран» пынă урхамахсем тĕп парнене те пĕрре мар тивĕçнĕ. Акă, 2009 çулта Николай Козлов тытса пыракан «Кобра» ут «Камай уйĕн урхамахĕсем» турнирăн çĕнтерÿçи пулнăччĕ. Пĕлтĕр те Александр Пыркинпа Алексей Скворцов хăйсен лашисемпе иккĕмĕшпе виççĕмĕш вырăнсене йышăннăччĕ. Çитес çулсенче шурутсене пысăкрах çитĕнÿсем тума ăнăçу сунас килет.
Ял поселенийĕсен командисен республикăри V спартакиадине Комсомольски район команди те хастар хутшăнчĕ. Художество пултарулăх конкур-сĕнче вĕсем пĕрремĕш вырăна тухса Диплом илме тивĕçрĕç. Пирĕн ял поселенийĕсен пуçлăхĕсем ĕçлеме çеç мар, юрлама-ташлама та, хут купăс тăсса калама та пултараççĕ. Комсомольски ял поселенийĕ вара РФ Перекет банкĕн Чăваш Енри управленийĕпе тачă ĕçленĕшĕн Дипломпа хаклă парнене тивĕçрĕ.
Источник: "Каçал Ен"