23 июня 2011 г.
Пирĕн район ял хуçалăх культурисем çитĕнтерес тĕлĕшпе те, выльăх-чĕрлĕх отраслĕнчи кăтартусемпе те республика шайĕнче палăрса тăрать. Ахальтен мар ĕнтĕ пĕлтерĕшлĕ мероприятисене пирĕн тăрăхра ирттерме тăрăшаççĕ. Машинăпа сĕт сăвакан операторсен 32-мĕш, техник-осеменаторсен 30-мĕш республикăри конкурсĕ те кăçал, июнĕн 16—17-мĕшĕсенче, «Восток» ял хуçалăх кооперативĕнче иртрĕ. Ку хуçалăх районта выльăх-чĕрлĕх отраслĕпе тимлĕ ĕçлекенсен йышĕнче. Республикăра та ун пирки лайăх пĕлеççĕ. Ăратлă выльăхпа ĕçлеççĕ, тĕрлĕ регионсемпе çыхăну тытаççĕ.
Эпĕ ытларах конкурс пирки чарăнса тăрасшăн. Ăмăртăва хутшăнакансене, хăнасене Хырхĕрри культура çурчĕн ĕçченĕсем çăкăр-тăварпа, савăк юрăсемпе кĕтсе илчĕç.
— Сире пурсăра та конкурсра ăнăçу сунатпăр,— терĕ Комсомольскинчи культурăпа кану центрĕн методисчĕ В.Н. Курицына. Вăлах ăмăртăва уçнă саманта та ăнăçлă ертсе пычĕ.
Чи малтанах ЧР ял хуçалăх министрĕн çумне Л.Г.Николаева сăмах пачĕç. Вăл пуçтарăннисене выльăх-чĕрлĕх отраслĕн кăтартăвĕсемпе паллаштарчĕ. «Иртнĕ çул пур хуçалăхсене те çăмăл килмерĕ. Çапах та республикăра выльăх-чĕрлĕх йышĕ те, продуктивлăх та питĕ нумай чакмарĕ»,— терĕ вăл. Конкурса хутшăнакансене хăйсен пултарулăхне туллин кăтартма вăй-хал сунчĕ.
Район администрацийĕн пуçлăхĕн çумĕ Г.М.Киргизов, Чăваш ял хуçалăх академийĕн преподавателĕ Р.М.Айзатов, «Восток» ял хуçалăх кооперативĕн председателĕ В.Г.Михеев тата ыттисем те çав шухăшсенех палăртрĕç.
Чăваш Республикин гимнĕ янăранă май иртнĕ çулхи çакăн пек конкурс çĕнтерÿçисем С.Г.Григорьева, Н.А.Сергеева ăмăрту ялавне çĕклерĕç.
Малалла вара машинăпа сĕт сăвакансен те, техник-осеменаторсен те хăйсен ĕçĕпе çыхăннă ыйтусене хуравлама тиврĕ. Конкурса хутшăнакансем вĕсене çăмăллăнах парăнтарчĕç. Ыйтăвĕсем кулленхи ĕçĕпе çыхăннă-çке.
Техник-осеменаторсем выльăхсене искусствăлла майпа пĕтĕлентерес ăсталăха кăтартрĕç, дояркăсем ĕнесем сума ларчĕç. Жюри кунта кашнин пĕлĕвне, ăсталăхне, тирпейлĕхне тимлĕн тĕрĕслерĕ, ĕçе мĕнле пурнăçланине сăнаса тăчĕ.
Тепĕр кун дояркăсем сĕт сумалли аппаратсене вăхăтпа салатса пуçтарчĕç. Кунта жюри вĕсен хăйне евĕр ăсталăхне шута илчĕ.
Чи хумхануллă самант — конкурса пĕтĕмлетесси. ЧР ял хуçалăх министрĕн С.В.Павловăн сăмахĕсенче республикăри выльăх-чĕрлĕх отраслĕнче ĕçлекенсен ĕçĕ-хĕлĕ пирки калаçни дояркăсене те, техник-осеменаторсене те килĕшрех пулĕ.
Район администрацийĕн пуçлăхĕпе Г.Ф.Волковпа вĕсем ăмăрту çĕнтерÿçисене хаклă парнесем, Хисеп грамотисем парса чысларĕç.
«Восток» ял хуçалăх кооперативĕнчи Е.Н.Каримкина техник-осеменатор 3-мĕш вырăн йышăннине палăртмаллах. Ку пысăк çитĕнÿ.
«Рассвет» ял хуçалăх кооперативĕн О.В.Наумова, «Восток» хуçалăхри М.Н.Белкова дояркăсем конкурсра малти вырăнсем йышăнман пулин те, ăсталăхпа палăрнă.
«Труд» ял хуçалăх кооперативĕнчи Е.В.Наумова техник-осеменатор та хăйне лайăх енчен кăтартнă.
Конкурс çÿллĕ шайра иртнине дояркăсем те, техник-осеменаторсем те, хăнасемпе представительсем те палăртрĕç. Çакăншăн «Восток» ял хуçалăх предприятийĕ, ЧР Ял хуçалăх министерстви, Комсомольски район администрацийĕ тăрăшни куç умĕнчех. Мĕншĕн «Восток» ял хуçалăх кооперативне чи малтан палăртрăмăр-ха; Паянхи кун çакăн пек пĕлтерĕшлĕ, республика шайĕнчи мероприятие йĕркелеме, ăна тивĕçлĕ шайра ирттерме пултаракан хуçалăхсем сахал. Малашне те вĕсене хăват, унти ĕçченсене вăй-хал, хуçалăха ăнăçу сунатпăр. Выльăх-чĕрлĕхĕ ĕрчетĕр, сывлăхĕ пултăр.
Источник: "Каçал Ен"