18 июня 2011 г.
Иртнĕ кунсенче район администрацийĕн пуçлăхĕн призĕсене илессишĕн ирттернĕ районти ачасен ÿкерчĕкĕсен «Тĕнче — ачасен куçĕпе» VI конкурсне пĕтĕмлетнĕ. Ăна кăçал Раççейри Космонавтика çулталăкне халалланă.
Чи малтанах пухăннисене район администрацийĕн пуçлăхĕ Г.Волков, районти ача-пăча искусство шкулĕн директорĕ Ф.Гибатдинов, «Çĕр тата çынсем» музей ертÿçи И.Ядрова тата ыттисем те саламланă, ÿнерçĕ ăсталăхне ÿстерсе пыма ăнăçу суннă.
Районти искусство шкулĕнчи художество класĕнче Раççейри Художниксен союзĕн членĕ Вагиз Камалетдинов вĕрентет. Çак класа кăçал 7 çамрăк художник пĕтернĕ. Вĕсене пурне те Геннадий Федорович савăнăçлă ларура свидетельствăсем панă.
Конкурса хутшăнакансене район администрацийĕн пуçлăхĕ тав тунă. «Ÿкерчĕксем тĕлĕнмелле илемлĕ: таçтан шалтан шăранса тухакан чиперлĕхĕпе, тасалăхпа илĕртеççĕ»,— тенĕ Г.Волков, çамрăк ÿнерçĕсене мухтаса.
Çĕнтерÿçĕсене Дипломсем тата хаклă парнесем парса хавхалантарнă. Гран-прие Т.Шакмакова тивĕçнĕ.
Источник: "Каçал Ен"