15 июня 2011 г.
Афган вăрçинче пуçне хунă С.Е.Шмелева асăнса иртнĕ вырсарни кун Йÿç Шăхалĕнче футбол турнирĕ йĕркеленĕ. Ăмăртăва пурĕ 4 команда хутшăннă. Аслăарапуçсем (Патăрьел районĕ), йÿçшăхальсем – аслăраххисем, студентсем тата шкул ачисем футбол площадкинче хăйсен вăйĕсене виçнĕ.
Чи малтанах пухăннисем умĕнче Сергей Шмелева асăнса ăна шкулта НВП предмечĕпе вĕрентнĕ Г.Л.Краснов, пĕрле вĕреннĕ А.С.Михайлов, З.Е. Шмелева, А.Е.Шмелев, Л.С.Козлова тăванĕсем калаçнă. Çавăн пекех турнирăн тĕп судйи В.И. Лукиянов та сăмах илнĕ. «Паттăр ентеше асăнса çулсеренех вăйăсем ирттерни çитĕнекен ăрăва патриотизмла воспитани пама пулăшать. Афган çĕрĕ çинче интернационалла тивĕçне пурнăçласа пуçне хунă ентеше асăнса малашне те тĕрлĕ мероприятисем ирттерĕпĕр»,— тенĕ Валерий Иванович, спортсменсене ăнăçу сунса.
Хĕрÿ кĕрешÿре студентсен команди пĕрремĕш вырăна тухнă.
Мероприятие йĕркелекенсем вăйă ирттерме спонсорла пулăшу панă А.С.Михайлова тав тунă.
Источник: "Каçал Ен"