15 июня 2011 г.
Çĕнĕ Мăратри халăх музейĕ уçăлнăранпа чылай çул ĕнтĕ. Ялăн, «Заря» хуçалăхăн, кунта пурăнакансен историне кăтартакан экспонатсемпе материалсем упранаççĕ кунта. Шкул ачисемпе ял çыннисем çеç мар, хамăр тăрăхра çуралса ÿссе çĕр-шывăн тĕрлĕ кĕтесĕсенче тымар янисем те килсех çÿреççĕ. Пушă алăпа мар, хăйсен япалисене илсе килеççĕ. Акă кăçал музей темиçе экспонатпа пуянланчĕ. Çар летчикĕсем пулнă Вячеслав Шуряшкинпа Святослав Константинов хăйсен шлемĕсене, планшетне парнелерĕç. Отставкăри майорсем халь иккĕшĕ те Шупашкарта пурăнаççĕ, предпринимательсем. Ыттисем те паллă тăванĕсен япалисене музее парнелеме пултараççĕ.
Çуллахи каникул кунĕсенче шкул ачисене, хуларан килнисене музее çитсе курма сĕнетĕп. Кунта хăвăрăн тăван тăрăх çинчен ытларах пĕлме, тавра курăмăра анлăлатма май пур.
Источник: "Каçал Ен"