15 июня 2011 г.
Июнĕн 6-мĕшĕнче район администрацийĕ çумĕнчи санитарипе эпидемиологи комиссийĕн черетлĕ ларăвĕ пулчĕ. Унта «2009—2020 çулсенче Комсомольски районне ĕçмелли пахалăхлă шывпа тивĕçтересси» программăна районта епле пурнăçланине сÿтсе яврĕç. Пирваях Петр Силивестров Комсомольски ял поселенийĕнче асăннă программăна пурнăçа кĕртес тĕлĕшпе мĕнле ĕçсем туни çинче чарăнса тăчĕ. Иртнĕ çул шахтăллă 9 пусă юсанă. Шыв пахалăхне тĕрĕслеме тăтăшах пробăсем илнĕ. Унра борпа литий виçи кирлинчен пысăккине палăртнă. Шел пулин те, çав виçене чакармалли приборсем питĕ хаклă тăраççĕ, вĕсене туянма ял поселенийĕ укçа-тенкĕ çитереймест. Ытти çĕрти проблемăсем пирки ял поселенийĕсен пуçлăхĕсем каласа пачĕç.
«Комсервис» предприяти ертÿçи Сергей Макаров район центрĕнчи çуртсене шывпа тивĕçтерес ыйтупа калаçрĕ. Нумай хваттерлĕ çуртсенче шыв счетчикĕсем лартмаллине те аса илтерчĕ вăл. Роспотребнадзорăн ЧР управленийĕн Патăрьелĕнчи территориллĕ уйрăмĕн начальникĕн çумĕ Анатолий Прохоровпа санитарипе эпидемиологи комиссийĕн председателĕ Георгий Киргизов ларура пăхса тухнă ыйтăва пĕтĕмлетрĕç, шыв пахалăхне лайăхлатмалли мероприятисене йĕркелеме хушрĕç, йышăну кăларчĕç.
Источник: "Каçал Ен"