08 июня 2011 г.
Июнĕн 4-мĕшĕнче Ульяновск хулинче Пĕтĕм Раççейри чăваш наци уявĕ «Акатуй» иртрĕ. Уява уçиччен Чăваш Республикин Президенчĕпе Михаил Игнатьевпа Ульяновск облаçĕн губернаторĕ Сергей Морозов, РФ Патшалăх Думин депутачĕ Константин Косачев тата Чăваш Ен делегацийĕн членĕсем И.Я.Яковлев палăкĕ умне чĕрĕ чечексем хучĕç. Ун хыççăн Правительство çуртĕнче ĕçлĕ тĕл пулу пулчĕ. Президент Губернатора лайăх йышăннăшăн тав турĕ. «Ульяновск облаçĕнче пурăнакансем, хăнасем Чăваш культурин кунĕсене кăмăлласа йышăнчĕç. Çакă пире питĕ савăнтарать»,— терĕ Михаил Васильевич. Сергей Морозов регионта çырăнтару кампанийĕ епле пыни çинчен каласа панă май облаçри чăваш хаçатне «Канаша» ыйтакансем йышланнине палăртрĕ.
Пĕтĕм Раççейри чăваш наци уявĕ «Акатуй» уçăлас умĕн пирĕн творчество коллективĕсем юрăпа-ташăпа Çĕнтерÿ площачĕ, Гончаров, Кузнецов урамĕсемпе иртсе Ленин лапамне çитрĕç, Ульяновск облаçĕнчи ансамбльсемпе пĕрлешрĕç. Вĕсем çумне Раççейри 25 регионтан, 4 çĕр-шывран уява килсе çитнĕ диаспорăсем хутшăнчĕç. Вăйă картине Чăваш Енпе Ульяновск пуçлăхĕсене те тăма йыхăрчĕç. Михаил Игнатьевпа Сергей Морозова наци тумĕ — шупăр — тăхăнтартрĕç. 85 творчество коллективĕ, пин сасă чăваш халăх гимнне — «Алран кайми» — шăрантарчĕç. Шел пулин те, çумăр витререн янă пек тăкса антарни пурне те шалалла кĕме е палаткăсенче пытанма хистерĕ.
«Акатуйăн» официаллă пайне Ульяновск облаçĕн Правительство çуртĕнче уçрĕç. М.Игнатьевпа С.Морозов Акатуй уяв çеç мар, унăн пĕлтерĕшĕ самай анлăрах пулнине палăртрĕç.
Уявăн чи кăмăллă саманчĕ — патшалăх наградисене пани. Икĕ регион хушшинчи экономикăпа культура хутшăнăвĕсене çирĕплетме пысăк тÿпе хывнăшăн Михаил Игнатьев Ульяновск облаçĕн губернаторне Сергей Морозова «Чăваш Республики умĕнчи тава тивĕçлĕ ĕçсемшĕн» орденăн медалĕпе наградăларĕ. Çакăн пек чысах Ульяновск облаçĕнчи чăвашсен наципе культура автономийĕн ĕçтăвкомĕн председателĕ Владимир Сваев та тивĕçрĕ. Облаçри «Канаш» чăваш хаçачĕн редакторне Николай Ларионова вара «Чăваш Республикин культурин тава тивĕçлĕ ĕçченĕ» ят пачĕç. ЧР Хисеп грамотипе те чи маттуррисене, хастарррисене чысларĕç.
Михаил Игнатьев кÿршĕсене те парнесем пачĕ. Чĕмпĕрти халăх культурин центрĕ «Газель» микроавтобуспа пуянланчĕ. Хулари ачасен лаша спорчĕн шкулне Михаил Игнатьев рысак парнелерĕ. «Пирĕн халăх лашана пурнăçпа çыхăнтарать, вăл ĕçченлĕх, тÿсĕмлĕх, çирĕплĕх палли те»,— терĕ Президент. Ульяновск облаçĕн Губернаторĕ те парăмра юлмарĕ, ЧР культура министрне Роза Лизаковăна УАЗ автомашина уççине тыттарчĕ. Вăл Чăваш пукане театрĕн транспорт паркне пуянлатĕ. Çак залра Комсомольскинчи культурăпа кану центрĕ çумĕнчи «Каçал» ансамбль хăйсен пултарулăхĕпе паллаштарчĕç.
Ленин площадĕнче вара иртенпех халăх промысла ăстисен ĕçĕсен выставкисем ĕçлерĕç. Кунтах икĕ регионти общепит предприятийĕсем тĕрлĕ таварпа сутă турĕç. Комсомольски район пуçлăхĕ, райпо совечĕн председателĕ Е.И.Карпеев та Чĕмпĕрти Акатуя хутшăнчĕ. Комсомоль-ски районĕнчи кооператорсем хăйсен продукцине халăх умне кăларчĕç. Райпо, «Кооператор» ĕçченĕсем уява пухăннисене тутлă апат-çимĕç сĕнчĕç, вĕсене туянакансем те йышлă пулчĕç. Михаил Игнатьевпа Сергей Морозов та ку павильонсенче пулса курчĕç, тĕрлĕ тавара пахаларĕç.
Источник: "Каçал Ен"