08 июня 2011 г.
Июнĕн 4-мĕшĕнче, шăмат кун, район çыннисем Комсомольски вăрманĕн Хĕр уçланкине йышлăн пуçтарăнчĕç. Йăлана кĕнĕ йĕркепе, çурхи ĕçсем вĕçленсен, кашни çулах вĕсем хăйсен пысăк уявне — Акатуя ирттерме пуçтарăнаççĕ. Çанталăкĕ çумăрлă пулсан та, халăх йышлăн пухăнчĕ.
Ĕçпе юрă тата спорт уявĕ Акатуй ватти-вĕттишĕн яланах кĕтнĕ уяв шутланнă, шутланать те.
Кăçалхи 60-мĕш Акатуя Раççейри Космонавтика çулталăкне халаллани çинчен пĕлтерчĕç Чăваш Республикин культура тава тивĕçлĕ ĕçченĕ Валентина Курицынапа Сергей Просвирнов ертсе пыракансем. Район администрацийĕн пуçлăхĕ Геннадий Волков сцена çине хăпарса Акатуй уявĕ пуçланнине пĕлтерчĕ. Вăл ял ĕçченĕсене çурхи уй-хир ĕçĕсене кĕске вăхăтра тата пахалăхлă ирттернĕ ятпа саламларĕ, хастар пулнăшăн тав турĕ, ĕçре малашне те пысăк çитĕнÿсем тума ăнăçу сунчĕ.
Уяв ялавне кăçалхи çур акинче палăрнă Лариса Портновăпа («Сюрбеево» ООО) Владимир Мукшин («Искра» колхоз) хăпартрĕç. Районти пĕрлештернĕ хор Чăваш Республикин гимнне янратрĕ. Пысăк хора Ирина Трофимовăпа Тит Титов дирижерсем ертсе пычĕç.
Тĕп хуламăртан килсе çитнĕ хăнасем те — Владимир Варсанофьев, ЧР ял хуçалăх министрĕн çумĕ, РФ Патшалăх Думин тата ЧР Патшалăх Канашĕн депутачĕсем Анатолий Аксаковпа Кияметдин Мифтахутдинов, «Кĕтне» ентешлĕх председателĕ Александр Капитонов тата ыттисем те пухăннисене салам сăмахĕсем каларĕç, ăнăçу сунчĕç.
Хĕрÿ тапхăрта палăрнă çĕр ĕçченĕсем, выльăх-чĕрлĕх пăхакансем район администрацийĕн Хисеп грамотисене, хаклă парнесене тивĕçрĕç.
Ун хыççăн художество пултарулăх коллективĕсемпе уйрăм солистсем уява килнĕ халăха савăк юрă-ташăпа тата такмаксемпе савăнтарчĕç. Акатуй концертне ял поселенийĕсен художество пултарулăх коллективĕсен чи лайăх номерĕсене суйласа илнĕ. Сцена çинче коллектив хыççăн коллектив улшăнса кăна тăчĕ. Акă Комсомольскинчи культурăпа кану центрĕнчи халăх вокал ансамблĕ «Çĕнĕ ял», Ольга Александровăпа Анна Можаева (Хирти Сĕнтĕр ял поселенийĕ) «Хĕрлĕ çырла» юрăсемпе куракансене тыткăнларĕç.
Уява суту-илÿ, обществăлла апатлану ĕçне пĕлсе йĕркелени илемлетрĕ. Кунта тĕрлĕ çĕртен килнĕ магазинсем хăйсен таварĕсене сĕнчĕç. Предпринимательсем те уяв çыннисене туллин тивĕçтерме тăрăшрĕç. Район çыннисем, килсе çитнĕ хăнасем тутлă шашлăкне те тутанса пăхрĕç.
Çавăн пекех уява килнисем «Юрла, чунăм, юрла!» мини-сценăпа юнашар вырнаçнă «Алă ăстисен хулине» те çитсе курчĕç. Унта тĕрĕ ăстисем, йывăçран касса тĕрлĕ япаласем хатĕрлекенсем, тăмран, чустаран, гипсран кĕлеткесем, оригами тăвакансем, çыхакансем тата ыттисем те хăйсен ĕçĕсене кăтартрĕç.
Вагиз Камалетдинов, Федор Гаврилов, Екатерина Антонова тата Анастасия Андреева ÿнерçĕсем, сăмахран, уява килнисене хăйсен ÿкерчĕкĕсемпе паллаштарчĕç.
Аслăрах çулсенчисемпе пĕрлех çамрăксем те ал ĕç тума хăнăхса пыни савăнтарать. Акă районти ача-пăча искусство шкулне çÿрекенсем Анастасия Макарова, Виктория Воронина, Разиля Фасхутдинова тата ыттисем те хăйсен ĕçĕсене тăратнă. Кашни çул хăй ăсталанă япаласемпе уява хутшăнакан Ольга Ершова (Шурут-Нурăс) кăçал та айккинче юлмарĕ.
Уява «Стар21ком» дилер центрĕнчен килнĕ хăнасем те хăйне евĕрлĕх кÿчĕç. Çынсем «SUZUKI» маркăллă çăмăл автомашинăсем çине ларса ярăнчĕç, техника меллĕхĕсене хаклама пултарчĕç.
Анкета çырса тултарнисем вара июлĕн 10-мĕшĕнче иртекен вылява хутшăнаççĕ. Пĕтĕмлетĕвĕсемпе «Suzuki 21.ru» сайт çине кĕрсе паллашма пултаратăр. 8(8352) 23-03-43 телефонпа шăнкăравласа ыйтса пĕлме май пур.
Ачасене те кичем пулмарĕ кăçал уявра. Вĕсем чун каничченех батут çинче сиксе савăнчĕç, «пăравуспа» та ярăнчĕç.
Ирĕклĕ майпа кĕрешекенсем хăйсен йĕри-тавра çынсене нумай пухрĕç. Вĕсен хушшинче тупăшу питĕ хĕрÿ иртрĕ. Никита Крылов (Аслă Чурачăк) чи паттăрри пулнине çирĕплетрĕ, така илме тивĕçрĕ. Тĕрлĕ виçеллĕ спортсменсем кавир çине тухса вăй виçрĕç. Айдар Галяутдинов (Канаш) 32, Станислав Григорьев (Аслă Чурачăк) 40, Андрей Артемьев (Анат Тимĕрчкасси) 46, Юрий Степанов (Анат Тимĕрчкасси) 50 килограмлисенчен пĕрремĕшсем пулчĕç. Тупăшура пирвайхи вырăнсене тухнисене Хисеп грамотисем тата хаклă парнесем парса чысларĕç.
Çав вăхăтра футбола кăмăллакансем те вăйă ирттерчĕç. 7 команда мини-футболла тупăшса хăйсен пултарулăхне кăтартрĕ. Пĕрремĕш вырăна «Кубня» (Комсомольски ял поселенийĕ) команда çĕнсе илчĕ. Иккĕмĕшпе виççĕмĕш вырăнсене Комсомольски 2-мĕш тата 1-мĕш шкулĕсен спортсменĕсем тухрĕç.
Уявра çăмăл автомашинăна 25 метрлă дистанцие туртнине курма чылайăн пуçтарăнчĕç. Çак ăмăртура Руслан Михеевпа (Вăрманхĕрри Чурачăк) Олег Волкова (Александровка) çитекенни пулмарĕ. Алă вăйĕ виçессинче (армреслинг) Михаил Амерханов (Урмаел) чи пултарулли пулчĕ. Хирти Ĕнелте пурăнакан Василий Голландцев кире пуканĕ йăтса пĕрремĕш вырăна çĕнсе илчĕ. Алă вăйĕпе туртăнассинче Владимир Калашниковпа Стас Шкаблев (Комсомольски), Владимир Волков (Аслă Чурачăк) чи ăстисем пулчĕç.
Источник: "Каçал Ен"