04 июня 2011 г.
О.Никитин Хурнай ялĕнче çуралса ÿснĕ. Хырхĕрринче 1990 çулта 8 класс пĕтерсен Патăрьелĕнчи 7-мĕш номерлĕ профессипе техника училищине вĕренме кĕрет. Виçĕ çултан алла повар дипломне илет. Çав çулах Олег çар тумĕ тăхăнать. Мускав облаçĕнчи Одинцово хулинчи стратеги пĕлтерĕшлĕ ракетăсен çар чаçĕнче чăваш ятне çÿллĕ шайра тытса службăра тăрать.
Хĕсметрен тăван ене таврăнсан Олег Анатольевич Комсомольскинчи ДОСААФ шкулне вĕренме кĕрет, водитель правине алла илет.
Паянхи кун Олег Никитин — «Восток» ЯХПКан тăрăшуллă механизаторĕ. Кăçал та вăл çурхи акара хăйне шаннă «МТЗ-82-1» маркăллă тракторĕпе хирте тăрăшрĕ.
«Тăван ене пурăнма таврăннишĕн кулянмастăп. Ялта хуларинчен пĕртте начар мар. Ĕçлеме кăна ан ÿркен. Картиш тулли выльăх-чĕрлĕх тытатпăр, кирлĕ çимĕçе пахчарах ÿстеретпĕр»,— терĕ Олег Анатольевич, ял пурнăçне килĕштернине пĕлтерсе.
«Восток» ЯХПК председателĕпе Валерий Михеевпа хуçалăх ĕçченĕсем пирки сăмах хускатрăм.
— Çĕр çинче çамрăксем питех ĕçлеме юратмаççĕ. Нумайăшĕ «вăрăм» укçа шыраса шапаша çÿрет. Ас тăватăп, темиçе çул каялла çур акине пĕр çамрăк та хутшăнмастчĕ. Халĕ вара лару-тăру лайăх еннелле улшăнса пырать. Хуçалăх ĕçченсене выльăх-чĕрлĕх валли утă-улăм парса пулăшать. Мĕншĕн тесен ялти çын ытларах сĕт сутса укçа тăвать,— пĕлтерчĕ Валерий Геннадьевич.
Малалла ертÿçĕ О.Никитин тракторист пирки асăнчĕ. Вăл çур акинче «иккĕмĕш çăкăр» лартнă çĕрте тăрăшса ĕçлерĕ.
Олег Анатольевичăн мăшăрĕ Галина Александровна райпо тытăмĕнче ĕçлет. Вăл ялти магазинта çынсене куллен кирлĕ таварпа тивĕçтерме тăрăшать. «Ĕçне кура — хисепĕ»,— теççĕ халăхра. Г.Никитинана çынсемпе сăпайлă пулнишĕн ял-йыш, кÿршĕ-аршă хисеплет.
Никитинсем 2 ывăл çитĕнтереççĕ. Аслă ывăлĕ Данил, вун пĕртискер, ашшĕ пекех ÿссе çитсен çар тумне тăхăнма ĕмĕтленет, салтак пулса çĕр-шыва хÿтĕлесшĕн.
Источник: "Каçал Ен"