04 июня 2011 г.
РФ Пенси фончĕн Комсомольски районĕнчи управленийĕн ĕçченĕсем тăтăшах Амăшĕн (çемье) капиталĕн патшалăх сертификатне савăнăçлă лару-тăрура параççĕ. Пĕтĕм тĕнчери ачасене хÿтĕлемелли кунра, июнĕн 1-мĕшĕнче те, çавăн пек мероприяти йĕркелерĕç.
Малтанах пухăннисем умĕнче РФ Пенси фончĕн Комсомольски районĕнчи управленийĕн начальникĕ С.В.Горбунов сăмах каларĕ. «Районта 2007 çултанпа çак сертификата илнисен шучĕ 777-рен те иртнĕ»,—терĕ Сергей Валерьевич. Малалла вăл сертификатпа ăçта усă курмалли çинчен кĕскен каласа пачĕ. Ун хыççăн район администрацийĕн социаллă хÿтлĕх пайĕн начальникĕ И.А.Никитина сăмах илчĕ, пурне те ăнăçу сунчĕ. «Çемье — кашни çыннăн пурнăçĕнче чи кирли, чи хакли. Ача вара çемьене илем кÿрет»,— терĕ Ираида Алексеевна.
Савăнăçлă лару-тăрура Валентина Зайцевăпа Лейсан Ямальтдинова виççĕмĕш , Айсылу Тукаева тăваттăмĕш, Наталия Шумилкина иккĕмĕш ачисемшĕн сертификатсем илчĕç. Светлана Дмитириева (сăн ÿкерчĕкре) вара йĕкĕреш ачасем çуратнă. Сертификата илме ачасен амăшĕ пепкисене кăна мар, кукашшĕне те илсе килнĕ.
Ĕçпе тивĕçтерекенсенчен ача амăшĕсене Т.Смирнова, С.Ванюшкина, В.Гордеев, В.Васильев тата ыттисем те саламларĕç, парнесем пачĕç.
Сертификата тивĕçнисене тата ытти хăнасене районти ачасен искусство шкулĕн воспитанникĕ Ксения Гришина «Радость моя» юрăпа саламларĕ. Çавăн пекех РФ Пенси фончĕн Комсомольски районĕнчи управленийĕн специалисчĕсем Ирина Гришина, Надежда Юманова, Татьяна Тарасова, Оксана Козина тата Сергей Албутов юрă-ташăпа савăнтарчĕç.
Источник: "Каçал Ен"