01 июня 2011 г.
9—11-мĕш классенче вĕренекенсем 2001 çултан вырăс чĕлхи предмечĕпе Пĕрлехи патшалăх экзаменне тытма пуçланă. Çавăнтанпа вара çулсеренех тата ытти предметсемпе те ачасен пĕлĕвне тĕрĕслеççĕ.
Акă майăн 30-мĕшĕнче 11-мĕш класс пĕтерекен хĕрсемпе каччăсем тепĕр хут парта хушшине ларса вырăс чĕлхипе тата литературипе экзамен пачĕç. Ăна кăçал районти 12 шкулти 240 вĕренекен тытрĕ.
«Пултаруллă ача сахал мар пирĕн. Вĕсем районта, республикăра кăна мар, Раççейре иртекен олимпиадăсенче те малти вырăнсене йышăнса экзаменсăрах вĕренме кĕме пултарчĕç. Вĕсенчен пĕри вăл — Комсомольски 2-мĕш вăтам шкулĕнче вĕренекен Настя Антонова. Хĕр ача вĕренÿре кăна мар, ытти конкурссенче те пултарулăх кăтартрĕ»,— терĕ вырăс чĕлхипе тата литературипе иртекен Пĕрлехи патшалăх экзаменĕн районти комиссийĕн председателĕ А.А.Яковлев.
Кăçал районти шкулсенче 11-мĕш класра вĕренекенсем çак экзамена Комсомольски 2-мĕш вăтам шкулĕнче тытрĕç. Пĕрремĕш экзамен пулнăран-и, тен, питех те хумхануллă самант пулчĕ вĕсемшĕн.
«Пĕлтĕрхипе танлаштарсан кăтартусем начар пулмалла мар. Шанас килет, вĕренекенсем ППЭ кăçал та ăнăçлă тытĕç. Пурнăçра тĕрĕс çул суйласа илĕç»,— терĕ район администрацийĕн вĕрентÿ пайĕн начальникĕ Н.А.Максимов.
Ытти предметсемпе çывăх кунсенче иртекен патшалăх экзаменĕсенче те шкул ачисем лайăх пĕлÿ кăтартасса шанас килет.
Пĕлетĕп, яшсемпе хĕрсем яваплă тапхăра тивĕçлĕ ирттерсе ярĕç.
Источник: "Каçал Ен"