28 мая 2011 г.
Акă ĕнтĕ кĕçех черетлĕ вĕренÿ çулĕ вĕçленет. Кăçал пирĕн районта 242 ача 11-мĕш, 366-ăн 9-мĕш класс пĕтереççĕ. Хырай Ĕнел вăтам шкулĕнче вара саккăрăн вунпĕрмĕшĕнчен, вун пиллĕкĕн тăххăрмĕш класран вĕренсе тухаççĕ. Майăн 25-мĕшĕнче вĕсем валли юлашки шăнкăрав уявĕ иртрĕ. Вăл савăнăçлă лару-тăрура пуçланчĕ: куçа илĕртекен чечек çыххисем, шкул тумĕ тăхăннă чипер хĕрсемпе патвар каччăсем, вĕсен ашшĕ-амăшĕ...
Чи малтанах выпускниксене саламласа шкул директорĕ Л.М.Макарова, Александровка ял поселенийĕн пуçлăхĕ В.Ф. Волков, район администрацийĕн вĕрентÿ пайĕн методисчĕ Н.М.Тимофеева, «Искра» колхоз председателĕ А.Н.Зайцев калаçрĕç. Вĕсем ачасене патшалăх экзаменĕсене ăнăçлă тытма, умри çĕр-çĕр çултан пĕрне суйласа илсе унпа пурнăç çулĕ çине тухма сĕнчĕç. 11 класс вĕренекенĕ Д.Силанов шкул, район чысне республикăри олимпиадăсенче хÿтĕлесе малти вырăнсем йышăннă. Шкул директорĕ каччăна Хисеп грамотисем парса чысларĕ.
Шкул пĕтерекенсен пĕрремĕш вĕрентекенĕсем, класс ертÿçисем тата вĕсен ашшĕ-амăшĕ те тухса калаçрĕç. Ку шкула таврари 6 ялтан çÿреççĕ, чăваш, вырăс, тутар ачисем пĕрле вĕренеççĕ, килĕштерсе пурăнаççĕ. Çавăнпа саламĕсем те тĕрлĕ чĕлхепе янăрарĕç.
Пĕрремĕш класра пĕлÿ пухакансем хăйсен сăввисенче вĕсем пекех пултаруллă пулма шантарчĕç.
Юлашки шăнкăрава пĕрремĕш класс хĕр ачи А.Потаповăпа А.Мартынов выпускник янраттарчĕç. Ун сасси пĕрре савăнтарчĕ, тепре хурлантарчĕ.
Асанкасси вăтам шкулĕнче вун пĕрмĕшсемпе тăххăрмĕшсене юлашки шăнкăрав уявĕпе саламлама район администрацийĕн пуçлăхĕ Геннадий Волков çитнĕ. «Хисеплĕ выпускниксем! Сире валли паян янăракан шăнкăрав эсир халиччен илтнисен йышши мар, вĕсенчен уйрăлса тăрать. Вăл ачалăх иртсе кайнине систерет. Патшалăх экзаменĕсенче çеç мар, пурнăçра та çитĕнÿсем тума ăнăçу, ырлăх-сывлăх сунатăп сире»,— тенĕ Геннадий Федорович.
Выпускниксене пĕрремĕш учителĕпе класс ертÿçи Зинаида Бурмаковăпа Елена Терентьева, 1-мĕш класра вĕренекенсем, ашшĕ-амăшĕсем саламланă. Вун пĕрмĕшсем те парăмра юлман, хăйсен вĕрентекенĕсене, ашшĕ-амăшне тав тунă, юрăсем шăрантарнă.
Çĕнĕ Мăрат вăтам шкулĕнче юлашки шăнкăрав уявĕ Чăваш Республикин гимнĕн сассипе уçăлчĕ. Кăçал вĕренсе пĕтерекен А.Басникова, В.Бархонова, Е.Зверева, С.Басников, Т.Лукова, С.Суромов республика ялавне çĕклерĕç.
Ачасене уяв ячĕпе шкул директорĕ А.С.Борисов, ун çумĕ О.А.Игнатьева, Тукай ял поселенийĕн пуçлăхĕ О.П.Андреева, «Заря» ЯХПК председателĕ Л.А. Киргизов саламларĕç. Район администраци пуçлăхĕн çумĕ Г.М.Киргизов ачасене тарăн пĕлÿ парас ĕçре нумай çул вăй хунă педагогсене Хисеп грамотисем парса чысларĕ. ЧР ял хуçалăх академийĕ ирттернĕ «Юный аграрий» конкурс çĕнтерÿçи П.Игнатьев та парнелĕ пулчĕ.
Кăçал шкул пĕтерекенсен пĕрремĕш вĕрентекенĕсем Р.М.Басникова (Çĕнĕ Мăрат), Л.Е.Сенатова (Тукай), И.А.Ильина (Тăманлă Выçли) сăмах илчĕç. Ăшă сăмахсем каланипе пĕрлех пурнăçăн кăткăс çулĕнче хăйсен вырăнне тупма сунчĕç.
Ашшĕ-амăшĕсен ячĕпе Л.И. Суромова, В.П.Плешкова, Е.Г. Басников тухса калаçрĕç, вĕрентекенсене ачасене тарăн пĕлÿ панăшăн тав турĕç.
Вунпĕрмĕш класра вĕренекен А.Чубуков, Е.Зверева тата В.Кузьмина юлашки шăнкăрав янраттарсан хăш-пĕрин шухăшĕ çитес экзаменсем пирки пулчĕ-тĕр, кам çуллахи каникулсене мĕнле ирттересси çинчен ĕмĕтленчĕ пуль.
Комсомольски 2-мĕш вăтам шкулĕнчен кăçалхи вĕренÿ çу-лĕнче 41 ача вĕренсе тухать. Юлашки шăнкăрав ячĕпе иртнĕ савăнăçлă уява Л.П.Макарова ертсе пычĕ. РОО представителĕ А.А.Яковлев саламларĕ. Шкул директорĕ Г.Е.Длинов ачасене малашнехи пурнăçра ăнăçу сунчĕ.
Халĕ шкул пĕтерекенсен пĕрремĕш учителĕ Л.П.Алексеева саламларĕ, ашшĕ-амăшĕ ячĕпе Л.Васильева, Е.Чернов, Г.Зейнетдинов сăмах илчĕç. Н.Я.Боровкова, А.В.Прокопьева вĕрентекенсем пĕрлехи патшалăх экзаменĕсене лайăх паллăсемпе тытма сунчĕç. Юлашки шăнкăрава 11-мĕш класра вĕренекен С.Васильевпа кăçал пĕрремĕш класри С.Чернова шăнкăртаттарчĕç. Конкурссенче, олимпиадăсенче палăрнисем Дипломсене, Хисеп грамотисене тивĕçрĕç.
Аслă Чурачăк вăтам шкулĕнчен кăçал 21 ача вăтам пĕлÿ илсе тухать. Шкул стенисенчен, тăван килтен уйрăлсан вĕсен хăй тĕллĕн пурнăç пуçланать. Шкул директорĕ С.А.Лукиянов, район представителĕ Р.Н.Жукова выпускниксене юлашки шăнкăрав уявĕпе саламланă май малашнехи кун-çулра çухалса каймалла марри, тĕллевсене пурнăçлассишĕн тăрăшмаллине палăртрĕç. Ашшĕ-амăшĕсен ячĕпе Л.Богатырева, Г.Чернова калаçрĕç. Вĕрентекенсене кулленхи пархатарлă ĕçшĕн тав сăмахĕсем каларĕç, ăнăçу сунчĕç.
Источник: "Каçал Ен"