25 мая 2011 г.
Кĕнеке пирки мĕн чухлĕ ырă сăмах каламан пулĕ. Вăл чун апачĕ те, пĕлÿ çăл куçĕ те. Унсăр пурнăç çук тесе калас килет. Эпĕ пушă вăхăт тупăнсанах алла кĕнеке тытатăп. Вуланăçемĕн сăнарсен тыткăнне лекетĕп те, вĕсенчен уйрăлас та килмест. Вĕсемпе пĕрре савăнатăн та, хурланатăн та. Пытармастăп, вуласа тухайман кĕнекене минтер айне хурса çывăрни те пулнă. Мана кĕнекепе туслашма пуçламăш классенче вĕрентнĕ Т.А.Тукмакова, вырăс чĕлхипе литературин учителĕ Л.П. Русакова, З.Я.Михайлова библиотекарь пулăшнă. Вĕсенчен тĕслĕх илсех эпĕ библиотекарь специальноçне суйласа илтĕм.
Хирти Выçли ял библиотекине халăх йышлăн çÿрет. В.Макаров, И.Гаврилов, Н.Ракчеев, Г.Павлова, А.Фуражкин, Аполоновсемпе Степановсен, Яковлевсемпе Адигановсен, Петровсен çемйисем фондри мĕн пур кĕнекене вуласа тухнă та пулĕ. Тăтăшах пирĕн патăрта пулаççĕ, çĕнĕ кĕнекесене илсе каяççĕ.
Самана улшăннă май чылайăшĕ вăхăта телевизор, компьютер умĕнче ирттерет. Çав вăхăтрах кĕнекене хаклама пĕлекенсем, илемлĕ литературăна юратакансем пурри савăнтарать.
Кĕнекесемпе туслашасси мĕн пĕчĕкренех пуçланать. Малтан пĕчĕк калавсем, юмахсем кăсăклантараççĕ. Каярахпа калавсемпе повеçсем тыткăнлаççĕ. Ÿссе çитсен вара романсене шĕкĕлчеççĕ.
Манăн Хирти Выçлири шкул-садикре ĕçлекенсем пирки чарăнса тăрас килет. Унта шкула кайичченех ачасене кĕнекесемпе кăсăклантараççĕ. О.П.Ялукова воспитатель, кĕçĕн классене вĕрентекен Г.Е.Кузнецовăпа А.П.Аполонова тăтăшах тĕрлĕ мероприятисем ирттерсе тăван чĕлхене юратма, хисеплеме вĕрентеççĕ, ачасене кĕнекесем çумне явăçтараççĕ.
2011 çул — Космонавтика çулталăкĕ. Ăна халалласа «Çăлтăрсем чĕнеççĕ» ÿкерчĕксен конкурсĕ йĕркелерĕмĕр. «Космос — вĕçсĕр-хĕрсĕр уçлăх» кĕнеке выставки çулталăк тăршшĕпех ĕçлет.
Библиотекăра тăтăшах тĕрлĕ мероприятисем йĕркелетпĕр. Кĕнеке эрни, чăваш чĕлхин кунĕ иртет. Библиографи урокĕсене, конкурссене, литература вăййисене, кĕнекесен, хаçат-журналсен тишкерĕвĕсене вулакансем хастар хутшăнаççĕ. Хавхалантарас тесе çĕнтерÿçĕсем валли пĕчĕк парнесем те уйăратпăр.
Ачасем — библиотекăн чăн-чăн тусĕсем. Вĕсем вĕçен кайăксене хĕл вăхăтĕнче мĕнле пăхни, çуркунне вĕçсе килнисене епле кĕтсе илни пирки каласа панине чун хавалĕпе итлетĕп. Ачасене çут çанталăка юратма çыравçăсен кĕнекисем те пулăшнишĕн савăнатăп. «Пурте пĕлекен юмахсем» конкурс ирттересси йăлана кĕнĕ. Унта Хирти Выçлири шкул-садикре вĕренекен Эльза Кузнецова, Анжелика Карпова, Саша Зайцев, Валерияпа Данил Яковлевсем палăрчĕç.
Хирти Выçли ял библиотекинче телевизор та, интернетпа çыхăнтарнă компьютер та çук. Фондра 8 пин экземпляр кĕнеке шутланать. Чăвашла кĕнекесем сахал пулни пăшăрхантарать. Çапах та ял халăхĕ библиотекăна çÿрени, кĕнекесенчен писменни савăнтарать.
Источник: "Каçал Ен"