25 мая 2011 г.
Ял хуçалăх предприятийĕсенче çурхи ака-суха ĕçĕсем вĕçленмен-ха. Специалистсемпе механизаторсем çур тыррисене тата ытти культурăсене вăхăтра, пахалăхлă акса-лартса хăварасшăн. Майăн 24-мĕшĕ тĕлне ял хуçалăх предприятийĕсем 8200 гектар лаптăк çине пĕрчĕллĕ тата пăрçа йышши тырăсем акнă. Ку ĕçе хăш-пĕр хуçалăхсенче вĕçленĕ те.
Планпа пăхнă тăрăх, пĕрлешÿллĕ хуçалăхсен кăçал 2250 гектар çĕр улми лартмалла. Çак ĕçе 1300 гектар çинче пурнăçланă.
Хальлĕхе 1978 гектар пĕр çул ÿсекен курăксем акнă. Выльăх кăшманĕн лаптăкĕ ытти çулсемпе танлаштарсан нумаях мар. 2011 çулта районĕпе ăна 85 гектар çинче çеç çитĕнтерме палăртнă. Хальлĕхе 77 гектар акнă.
Уй-хир тĕл-тĕл симĕс тумпа витĕнчĕ. Хуçалăхсем калчасем ăнăçлă ешерччĕр тесе сиенлĕ чир-чĕрпе, хурт-кăпшанкăпа, çум курăкпа кĕрешес тĕлĕшпе агротехника ĕçĕсем тăваççĕ. Ку енĕпе «Слава картофелю» агрофирма, Минатуллинăн фермер хуçалăхĕ ăнăçлă ĕçлеççĕ. Ытти ял хуçалăх предприятийĕсен те ку енĕпе тăрăшмалла. Халăхăн «Кая юлсан каю шăтать» текен каларăшне асра тытса агротехника ĕçĕсене вăхăтра пурнăçласчĕ. Çурхи кун — çулталăклăх, теççĕ. Паян мĕнле ĕçленине кĕркунне кăтартса парать.
Источник: "Каçал Ен"