14 мая 2011 г.
1921 çулхи апрелĕн 16-мĕшĕнче Йăлмахва ялĕнче вулав çурчĕ уçăлнă. Унта А.Антонов пуçласа ĕçленĕ.
1948 çулта Василий Николаевич Чаржов ĕçлеме пуçланă. Йăлмахвари вулав çуртĕнче чи малтанхи инвентарь кĕнекине уçса çыракан Иван Дмитриевич Дмитриев пулнă. Вăл 1926 çулта çуралнă, Аслă Отечественнăй вăрçă участникĕ. 1951—1959 çулсенче вулав çурчĕн заведующийĕнче ĕçленĕ вăл. Ăна ĕçе илнĕ хут паянхи кун та упранать. Ун хыççăн чылай çын тăрăшнă пирĕн ял библиотекинче. Людмила Мефодьевна Лебедева, Юлия Ивановна Фомина, Виталий Герасимович Антонов. Чи нумай ĕçлекенĕ Зинаида Николаевна Григорьева пулнă.
2007 çулта Йăлмахва библиотеки тĕслĕх библиотекин статусне илчĕ. Йăлана кĕнĕ тĕллевсем çумне информаци центрĕсем тăвакан ĕçсем хутшăнчĕç. Çакă вара унăн ĕмĕртенхи технологийĕсене, халăх ыйтăвĕсене тивĕçтерессине тĕпренех улăштарчĕ. Тĕслĕх библиотеки халĕ кĕнекесен управçи çеç мар. Паянхи кун шайне тивĕçтерекен компьютер техники, видеокассетăсем, тĕрлĕ программăллă компакт-дисксем, ытти информаци çăл куçĕсем унăн уйрăлми пайĕ пулса тăчĕç. Енчен те кирлĕ информаципе кĕнеке тĕлĕшпе библиотека вулакансен ыйтăвне тивĕçтереймест пулсан, компьютер технологийĕ, интернет пулăшма хатĕр. Унăн пулăшăвĕпе усă куракансем чылай библиотекăра.
Кĕнекесен шучĕ библиотекăра 9 пин те 200 экземпляр. Çулталăк хушшинче унта 125 çĕнĕ кĕнеке килчĕ. 15 хаçат-журнал çырăнса илетпĕр. Вулакансем тĕрлĕ ыйтупа çÿреççĕ вулавăш çуртне. Кашни çын ыйтнине тивĕçтерес тесе тăрăшатпăр. Час-часах литература каçĕсем, викторинăсем, конкурссем йĕркелетпĕр, писатель е поэт юбилейĕ тĕлне кĕнеке выставкисем, литература тишкерĕвĕсем ирттеретпĕр.
Иртнĕ çул Вĕрентекенсен çулталăкне халалласа Йăлмахвари, Кайнлăкри, Хирти Мăнтăрти ветеран-вĕрентекенсемпе шкул ачисен тĕл пулăвне ирттертĕмĕр. Кашнин пиркиех ăшă сăмахсем пулчĕç, шкул ачисем вĕсенчен интервью илчĕç, çавăн пекех «Тавах вĕрентекенĕмĕр, тавах!» презентаци кăтартрăмăр.
Вулакансен шутĕнче тĕрлĕ профессиллĕ çынсем пур. Акă, Н.К.Смирнов, А.П.Ефремов, Г.Н.Чаржов тивĕçлĕ канура пулсан та паянхи кун библиотекăпа тачă çыхăну тытаççĕ. Вĕсем вуламан кĕнеке юлман та пулĕ. Шкул ачисем те библиотекăпа тачă çыхăну тытаççĕ. Вĕсемпе библиографи урокĕсем, викторинăсем, экскурсисем ирттеретпĕр.
2011 çул Космонавтика çулталăкĕ пулнă май ачасемпе тĕрлĕ мероприятисем ирттертĕмĕр. А.Г.Николаев, Ю.А.Гагарин çинчен презентаци курма пултарчĕç ачасем библиотекăра. Космонавтика çулталăкне халалланă кĕнеке выставкипе паллашрĕç. Библиотекăн çывăх тусĕсене те асăнса хăварас килет: Виктория Рыжова, Аня Филиппова, Оксана Максимова, Валерия Корнилова, Наталия Платонова, Юлия Кузьмина, Аня Алякина, Людмила Алямшина, Анастасия Миронова. Вĕсем библиотекăра иртекен мероприятисене яланах хутшăнаççĕ. Ваттисен, аннесен кунĕсенче хăйсен пултарулăхĕпе савăнтараççĕ.
Библиотекăпа яланах туслă пулăр. «Кĕнеке — пĕлÿ çăлкуçĕ» тесе ахальтен каламан пулĕ. Кĕнеке вĕренÿре те, ĕçре те, канура та яланах кирлĕ. Унпа туслашни, ăна вулани ăс-тăна пуянлатать.
Библиотека кĕнеке тусĕсемшĕн яланах уçă.
Источник: "Каçал Ен"