11 мая 2011 г.
Тăван çĕр-шывăн Аслă вăрçи тĕнче историйĕнче тарăн йĕр хăварнă. Шел, çулсерен ветерансен йышĕ чакса пырать. Çĕнтерĕве çывхартнă çынсен ячĕ пĕтĕм халăх асĕнче.
Кăçалхи майăн 9-мĕшĕ хĕвеллĕ те ăшă пулчĕ. Аслă Çĕнтерĕве 66 çул çитнине уявлама район центрĕнчи Çĕнтерÿçĕ-салтак палăкĕ умне вăрçă ветеранĕсемпе тыл ĕçченĕсем, шкул ачисем, предприятисемпе организацисенче вăй хуракансем, хăнасем пуçтарăнчĕç.
Пухăннисене район пуçлăхĕ Евгений Карпеев, район администрацийĕн пуçлăхĕ Геннадий Волков, Чăваш Республикин Патшалăх Канашĕн депутачĕ, «Газпромтранс-Чебоксары» ООО генеральнăй директорĕ Кияметдин Мифтахутдинов, республикăри çар комиссариачĕн Комсомольскипе Елчĕк районĕсен уйрăмĕн начальникĕ Андрей Маурин, афганецсен районти совечĕн председателĕ Виктор Гаврилов тата ыттисем те саламларĕç. «Тĕнчен иккĕмĕш вăрçи этемлĕх пурнăçĕнче, историйĕнче юлашки пултăр, унăн синкерлĕхне урăх никам та ан куртăр. Çĕнтерÿ кунне куççуль кăлармасăр ниепле те паллă тума май çук. Паян эпир хăрушă вăрçăран таврăнайманнисене аса илетпĕр. Тăнăçлăха сыхласа хăварнă тата çĕнĕ ăрăва телейлĕ пурнăç парнеленĕ ветерансен умĕнче пуç таятпăр. Сирĕн паттăрлăх вилĕмсĕр»,— терĕ Геннадий Федорович, Çĕнтерĕве çывхартассине район çыннисем пысăк тÿпе хывнине палăртса.
Сергей Зубарев, Василий Скворцов вăрçă ветеранĕсем, Комсомольски 2-мĕш вăтам шкулĕнче вĕренекен Алена Ефремова сăмах каларĕç, уява хутшăнакансене саламларĕç.
Ун хыççăн вара ĕç коллективĕсен представителĕсем палăксем патне чечек кăшăлĕсем, чĕрĕ чечек çыххисем хучĕç.
Каярахпа районти шкулсенчен килнĕ çамрăк армеецсем смотра хутшăнчĕç.
Комсомольскинчи культурăпа кану центрĕн ĕçченĕсем пухăннисем умĕнче юрăсем шăрантарчĕç, кăмăл-туйăма çĕклерĕç. Районти искусство шкулĕн воспитанникĕсем те куракансене ташăсем парнелерĕç.
Уяв программине Новелла Розовăпа Сергей Просвирнов ертсе пычĕç.
Районти тĕп библиотека умĕнче те Çĕнтерÿ кунне халалласа мероприяти иртрĕ. Библиотека ĕçченĕсем вăрçă кунĕсене халалланă кĕнекесен выставкине йĕркеленĕ. Çавăн пекех кунта килекенсем «Ваш подвиг будет обжигать сердца» ятлă мультимедийлă презентаципе паллашма пултарчĕç. Ачасем асфальт çинчи ÿкерчĕксен конкурсне хутшăнчĕç. Унта хутшăннисене библиотека ĕçченĕсем пылак çимĕçсемпе сăйларĕç. Конкурсантсенчен чи çамрăкки 2 çулта, чи асли 12-ре пулчĕç.
Çак кун Кĕçĕн Каçалти стадиона та палăртнă вăхăта спорта тата физкультурăна юратакансем, футбола кăмăллакансем пухăнчĕç. 7 команда тупăшрĕ вăйăра. Вĕсен ăмăртăвĕ хĕрÿ иртрĕ. Блиц-турнирта кубока Комсомольски командин спортсменĕсем çĕнсе илчĕç. Иккĕмĕшпе виççĕмĕш вырăнсене ийĕсенчен килнĕ футболистсем йышăнчĕç.
Пирĕн республикăра снарядсемпе бомбăсем сирпĕнмен пулсан та, Тăван çĕр-шывăн Аслă вăрçи чăваш çемйисенче тарăн, нихăçан та тÿрленейми йĕр хăварнă. Паллах, паттăрсене манманни, вĕсен ячĕпе уяв йĕркелени — ырă пулăм. Анчах пурнăçуявран кăна тытăнса тăмасть-çке. Шăпах пиртен пуринчен те кирлĕ ватăсене пулăшу. Паянхи кун 52-ĕн вĕсем пирĕн районта. Ветерансене май пур таран пулăшасчĕ. Ватăсене пулăшни сăвап кăна пулĕ.
Источник: "Каçал Ен"