07 мая 2011 г.
Ака уйăхĕ паллă уявсемпе пуян пулчĕ. Чăваш халăх писателĕ Юхма Мишши 75 çул, чăваш халăх поэчĕ Валери Туркай 50 çул тултарчĕç, çын пĕрремĕш хут тĕнче уçлăхне вĕçнĕренпе 50 çул çитрĕ. Чăваш халăхне çутта кăларакан, Чăваш чĕлхин кунĕ те пысăк пĕлтерĕшлĕ пулчĕ.
Комсомольски 2-мĕш вăтам шкулĕнче çак уявсене тĕплĕн хатĕрленсе ирттертĕмĕр. «Юхма Мишши — ача-пăча çыравçи» темăпа презентаци хатĕрлерĕмĕр. Ку ĕçре 7-мĕш класра вĕренекен М.Сапожникова пултарулăхпа палăрчĕ. Кĕçĕн классенче вĕренекенсем çыравçă юмахĕсем тăрăх ÿкерчĕксем турĕç. Шкулти библиотекăра кĕнекесен выставкине йĕркелерĕмĕр, хаçат кăлартăмăр.
Чăваш халăх поэчĕпе Валери Туркайпа йĕркеленĕ тĕл пулу та ачасен асĕнче юлчĕ.
«Чăваш Республикин космонавчĕсем» темăпа 9-мĕш класра вĕренекен О.Смирновăпа М.Петрова презентаци хатĕрлерĕç, Чăваш наци библиотеки Космонавтика çулталăкне халалласа ирттернĕ конкурса та хастар хутшăнчĕç. И.Я.Яковлева халалласа классенче тĕрлĕ мероприятисем пулчĕç. Вĕсенче чăваш халăхне çутта кăлараканăн пурнăçне, ĕçĕ-хĕлне тишкертĕмĕр. Виççĕмĕш класра вĕренекенсем «Яковлев мăнукĕсем» вăйă-конкурсра тупăшрĕç. Ÿсекен ăру чăваш халăхĕшĕн чунне парса ĕçленĕ И.Яковлев çинчен лайăх пĕлни савăнтарать.
«Мĕн? Ăçта? Хăçан?» викторинăра пиллĕкмĕшсем хăйсен пĕлĕвне тĕрĕслерĕç.
6-мĕш класра «Телейлĕ самант» конкурс та хăйне евĕрлĕ кăсăклă иртрĕ.
«Иван Яковлевич Яковлев тата Чĕмпĕрти чăваш шкулĕ» презентаципе паллашнă хыççăн 7-мĕш классем «Ăслисемпе ăслăскерсем» вăйăра тупăшрĕç.
Чăваш чĕлхи кунĕнче шкулта «Чăваш тĕнчи чăвашлăхпа илемлĕ» уяв иртрĕ. Ăна шкул директорĕн воспитани енĕпе ĕçлекен çумĕ Л.П.Макарова уçрĕ. Уявра чăваш юрри-ташши янăрарĕ. Н.Шингалова хăй çырнă сăвăпа паллаштарчĕ. М.Сидорова В.Туркай сăввине вуласа пачĕ. Ю.Козлова тата хор кружокне çÿрекенсем чăваш юррисене шăрантарчĕç. 10-мĕш класра вĕренекен Н.Замкова, Д.Васильева, О.Боровкова, М.Минина чăваш хĕрарăмĕн тумĕпе паллаштарчĕç. О.Карсаковăпа А.Ефремова уяв программине ертсе пычĕç тата чăваш ташшипе савăнтарчĕç.
Уява илемлетекенсем «Яковлев мăнукĕсем» пулчĕç. Вĕсем 3-мĕш класра вĕренекен А.Албутова, В.Буслаева, О.Кокорева тата В.Краснов. Пуçтарăннисене ачасем сăвăсем каласа савăнтарчĕç.
Шкулта филармони артисчĕсем хăнара пулчĕç. Вĕсен концертне вĕренекенсем тулли кăмăлпа курса савăнчĕç.
Ачасем район центрĕнчи «Çĕр тата çынсем» музейре историпе, паллă çынсемпе паллашрĕç. Уйăхлăх пирĕн шкулти ачасем чăваш чĕлхине юратса вĕреннине çирĕплетсе пачĕ. Ăнтăлăвĕ пур, вĕсене аталантарса çеç пымалла. Çакна шкулта чăваш чĕлхипе литературине вĕрентекен Н.Г.Боровкова, С.Г.Индюкова, Л.П.Макарова учительсем лайăх ăнланаççĕ.
Источник: "Каçал Ен"