04 мая 2011 г.
Майăн 3-мĕшĕнче райадминистраци залĕнче иртнĕ планеркăра Çĕнтерÿ уявне хатĕрленесси, район центрĕнчи, ялсенчи урамсене тасатасси, хутса ăшăтмалли тапхăр вĕçленни тата ытти çинчен калаçу пулчĕ. Район администрацийĕн пуçлăхĕ Геннадий Волков Тукай, Александровка ял поселенийĕсенче юлашки вăхăтра тирпей-илем енĕпе тăрăшса ĕçленине ырларĕ. Çав вăхăтрах Комсомольски ял поселенийĕ çак ыйту çине çиелтен пăхнине палăртрĕ.
Хальхи вăхăтра пирĕн хушăра Аслă Отечественнăй вăрçă участникĕсем 52-н пурăнаççĕ. «Вăрçă ветеранĕсем валли Çĕнтерÿ кунĕпе парнесем кÿрсе килнĕ. Шел, сывлăхне пула кашниех район центрĕнче иртекен уява килеймĕ. Вĕсене вырăнта чыслассине тивĕçлипе йĕркелесчĕ»,— терĕ социаллă хÿтлĕх пайĕн начальникĕ Ираида Никитина.
Источник: "Каçал Ен"