Публикации » Район чысне Максимовсем хÿтĕлерĕç

04 мая 2011 г.

Тĕп хуламăрта республикăри ĕç династийĕсен IX слечĕ пулнă. Кăçал унта район чысне Максимовсен династийĕ — медицина ĕçченĕсем — хÿтĕленĕ. Вĕсен ĕç стажĕ пурĕ пĕрле 194 çул. Максимовсен династийĕн пуçлăхĕ — Владислав Викторович. Вăл районти тĕп больницăра хирургра 1978 çултанпах тăрăшать. Пултаруллă шурă халатлă ĕçчене ĕçри тăрăшулăхшăн район администрацийĕ пĕр хутчен кăна мар Хисеп грамотипе наградăланă. Çавăн пекех В.Максимов Раççей Федерацийĕн Хисеп грамотине, «Чăваш Республикин тава тивĕçлĕ врачĕ», «Ĕç ветеранĕ» хисеплĕ ятсене те илме тивĕçнĕ. Владислав Викторовичпа пĕр тăвансем — Галина Викторовна (ĕç стажĕ 25 çул), Светлана Викторовна (ĕç стажĕ 40 çул), Олег Викторович (ĕç стажĕ 31 çул) сывлăх сыхлав тытăмĕнче ĕç леççĕ. Ывăлĕ Эдуард тата кинĕ Ирина та район больницинче вăй хураççĕ. Максимовсен ĕç династийĕнче — 8 çын. Вĕсем пурте юратнă ĕçне чунтан парăнса тăваççĕ.

Источник: "Каçал Ен"