30 апреля 2011 г.
Николай Краснов кăçалхи апрелĕн 6-мĕшĕнче 60 çулхи юбилейне паллă турĕ. Тĕпĕ-йăхне палăртас пулсан — хамăр районти Янкасси ялĕнчен. Николай 1968 çулта Комсомольски вăтам шкулне пĕтерет. Унтан çар службине Казахстанри Семипалатинск çывăхĕнчи чаçре ирттерет. Çартан таврăнсан районти физкультурăпа спорт комитетне ертсе пырать. Сĕнтĕрвăрринчи вăрман техникумĕнче пĕлĕвне ÿстерет, Мари Элри вăрман техникумĕнче инженерта ĕçлет. Тăван ене таврăнсан тĕрлĕ ĕçре тăрăшать, çăкăр завочĕн директорĕ те пулать. 1984 çултанпа Комсомольски 1-мĕш вăтам шкулĕнче ачасене пĕлÿ парать.
Спорта юратаканскер, кавир çинче кĕрешсе, йĕлтĕр йĕрĕ çинче пысăк çитĕнÿсем тăвать. Темиçе хутчен район чемпионĕ кăна мар, республика шайĕнче те çĕнтерÿçĕ ятне тивĕçет. Уйрăмах унăн спортри кăтартăвĕсем ирĕклĕ майпа кĕрешессинче курăмлă. Николай Васильевич республикăра иртнĕ 40—49 çулхисем хушшинче кавир çинчи ăмăртусене уйрăмах асра тытать. Кунта вăл республика чемпионĕн лентине тивĕçсе Францире иртекен тĕнче чемпионатне кайма путевка çĕнсе илет. Шел, хăйĕнчен килмен сăлтавсене пула спортсмен Парижа каяйман.
Йĕлтĕрпе чупассине илсен, Николай Васильевич Атăлçи зонинче çĕнтерсе Сыктывкар хулинче иртекен СССР чемпионатне те хутшăнать. Уйрăмах 10, 20 километрлă дистанцисенче пысăк çитĕнÿсем тăвать.
Кавир çинче хăйĕн ятне çÿлте тытнă спортсмена чысласа Комсомольски 1-мĕш вăтам шкулĕн спорт залĕнче апрелĕн 23-мĕшĕнче ирĕклĕ майпа кĕрешекенсен пысăк ăмăртăвĕ пулса иртрĕ. Турнир пуçланас умĕн нумай ăшă сăмах, асăнмалăх парнесем пулчĕç Николай Васильевич ячĕпе. Район админи-страцийĕн пуçлăхĕ Г.Ф.Волков та юбиляра саламларĕ.
Чăн малтан кавир çине 58 килограмм таранхи виçерисем тухрĕç. Пĕрремĕш тытăçу Комсомольскипе Анат Тимĕрчкасси каччисем хушшинче пулчĕ. Вĕсем — М.Замковпа Ю.Степанов. Тепĕр кĕрешÿ Ю.Степановпа Д.Малышев (Комсомольски) хушшинче иртрĕ. Çĕнтерÿçĕ — Малышев, вăлах чемпион лентине, премие тивĕçрĕ. Степанов — иккĕмĕш, Замков виççĕмĕш вырăнсене йышăнчĕç.
Тепĕр виçеллисем (63 килограмм) кавир çине тухсан, тĕлĕнмелли те пулчĕ. В.Краснов (район больницин васкавлă пулăшу машинин водителĕ), 60 çулхи спорт ветеранĕ, Асанкасси каччипе М.Максимовпа тытăçăва тухрĕ. Çамрăка çĕнтереймерĕ пулсан та ытти спортсменсемшĕн кăтартуллă самантсем нумай пулчĕç. Кунта М.Максимов чемпион ятне тивĕçрĕ. Иккĕ-мĕшпе виççĕмĕш вырăнсене Р.Прокопьевпа (Асанкасси) И.Иванов (Комсомольски) йышăнчĕç.
69 килограмм таранхи виçере те хĕрÿ кĕрешÿ пулчĕ. Кунта Аслă Чурачăк çамрăкĕ А.Волков çĕнтерчĕ. 74 килограмлисем хушшинче чи пултарулли Асанкасси спортсменĕ Е.Петухов пулчĕ. Унăн юлташĕ Н.Миронов иккĕмĕш вырăнпа тивĕçрĕ. Комсомольски çамрăкĕ С.Лукин — виççĕмĕш вырăн хуçи.
74 килограмран пысăкрах виçеллисем иккĕн кавир çине тухрĕç — В.Малышев (Комсомольски), Э.Иванов (Анат Тимĕрчкасси). Вячеслав çивĕчреххи, вăйлăраххи спортсменсем кавир çине тухсанах курăнчĕ. Çавăнпах чемпион ятне тивĕçрĕ те ĕнтĕ вăл.
Спонсорсен пулăшăвĕ те çак турнира кирлĕ шайра ирттерме майсем туса пачĕ. Н.Краснов М.Шарафутдинова, С.Горбунова, А.Чертынова, Х.Идиатуллина, В.Семенова пысăк тав сăмахĕ калать.
Источник: "Каçал Ен"