27 апреля 2011 г.
Иртнĕ шăмат кун, апрелĕн 23-мĕшĕнче, Комсомольски вăрманĕ хĕрринче çуллахи спорт сезонĕ уçăлнă ятпа кросс иртрĕ. Старта пĕтĕмĕшле пĕлÿ паракан, вăтам шкулсен, предприятисемпе организацисен командисем тухрĕç.
Чăн малтан ăмăртусене 500 метрлă дистанцире тăхăр çул вĕренмелли шкулсен хĕр ачисем пуçларĕç. Комсомольски 2-мĕш вăтам шкулĕн спортсменки Инга Кондратьева район чемпионки ята çĕнсе илчĕ. Александровка, Хирти Явăш хĕр ачисем Евгения Лукинапа Алмазия Тазетдинова 2—3-мĕш вырăнсене йышăнчĕç. Çак шкулсенчи арçын ачасем 1000 метра чупрĕç. Илья Григорьев (Хирти Явăш), Ильнур Айнетдинов (Чĕчкен), Геннадий Морозов (Хырхĕрри) чи пултаруллисем пулчĕç. Вĕсем хушшинче чĕчкенсем — пĕрремĕш, хиртиявăшсем — иккĕмĕш, тăманлăвыçлисем виççĕмĕш вырăнсене çĕнсе илчĕç.
Вăтам шкулсенче вĕренекен хĕр ачасем 1000 метрлă дистанцире тупăшрĕç. 12 шкул команди хутшăнчĕ кунта. Виктория Зимцовăпа Ольга Рябчикова (иккĕшĕ те Кĕçĕн Çĕрпÿел вăтам шкулĕнчен) пĕрремĕшпе иккĕмĕш вырăнсене тивĕçрĕç. Нĕркеç шкулĕн спортсменки Наташа Константинова виççĕмĕш çитрĕ.
Арçын ачасем хушшинче 2000 метра чупса Хырай Ĕнел шкулĕн спортсменĕ Артем Мартынов пĕрремĕш приз хуçи пулчĕ, Сергей Петров (Нĕркеç), Егор Земсков (Аслă Чурачăк) иккĕмĕшпе виççĕмĕш вырăнсене йышăнчĕç. Нĕркеç вăтам шкулĕн çăмăл атлечĕсем пĕрремĕш вырăна çĕнсе илчĕç. Иккĕмĕшпе виççĕмĕш вырăнсенче — Аслă Чурачăкпа Хырай Ĕнел спортсменĕсем.
Старта предпритяисемпе организацисенче ĕçлекенсем тухрĕç. Малтан хĕрарăмсем 500 метрлă дистанцире тупăшрĕç. Ирина Ефремовăпа Мария Кузьмина (иккĕшĕ те Кайнлăк ял поселенийĕнчен) малти вырăнсене хăйсен аллинчен ямарĕç. Арçынсен ăмăртăвĕнче вара (1000 метрлă дистанцире) йăлмахвасем чи маттуррисем пулчĕç. Герман Ефремов, Виталий Яковлев, Алексей Смирнов финиша чи лайăх кăтартусемпе çитрĕç.
Кайнлăк ял поселенийĕн спортсменĕсен команди — пĕрремĕш, александровкăсем иккĕмĕш вырăнсене йышăнчĕç.
Источник: "Каçал Ен"