27 апреля 2011 г.
Хырай Ĕнелĕнчи куллен кирлĕ таварсем сутакан магазина ял çыннисем хапăлласа çÿреççĕ. Унта кил-çуртра кунсерен кирлĕ пур япалана та туянма пулать. Альбина Николаевна Александрова заведующи таварсен ассортиментне пуянлатсах пырать. Вырăнта суту-илÿ тунипе çеç çырлахмасть вăл. Кÿршĕри Тутарстан Республикине кĕрекен ялсене те тухса çÿрет. Заказсем пулсан, автомашинăпа тивĕçтерсен таварсене килтен-киле валеçсе çÿрени те пулать. «Палăртнă плана уйăхсерен тултарса пыратпăр. Çакă халăх ыйтăвне туллин тивĕçтерес енĕпе ĕçленинчен килет»,— тет сутуçă.
Альбина Николаевна юрă-ташăпа та туслă. Сцена çине халăх юррисемпе пĕрре мар тухнă. Тĕрлĕ конкурссенче те хăйĕн пултарулăхне кăтартнă. Пурнăç тăршшĕпе унăн тĕрлĕ ĕçре вăй хума тивнĕ. Почтальон та, культура ĕçченĕ те. Кирек ăçта та пултарулăхпа палăрса тăнă.
Источник: "Каçал Ен"