23 апреля 2011 г.
Чăваш Енре, Комсомольски районĕнче апрелĕн 20-мĕ-шĕнче пулнă Пĕрлехи информаци кунĕн йĕркине виçĕ тĕп тема кĕртнĕ. Ĕç коллективĕсемпе иртнĕ тĕл пулусенче «Чăваш Республикинчи сывлăх сыхлавĕн ĕçне 2012—2013 çулсенче модернизацилесси», «Чăваш Енри нумай ачаллă çемьесене çĕр лаптăкĕсемпе тивĕçтересси» ЧР саккунне пурнăçа кĕртесси», «Вырăнти тата территориллĕ обществăлла самоуправлени органĕсен тирпей-илем кĕртес енĕпе тумалли задачисем тата граждансене çак ĕçе хутшăнтарасси» ыйтусене сÿтсе явнă.
Пирĕн района Пĕрлехи информкуна ирттерме Чăваш Республикин культура, наци ĕçĕсен, информаци политикин тата архив ĕçĕн министрĕ Роза Лизакова ертсе пыракан ушкăн килчĕ. Шупашкартан килнĕ хăнасем виçĕ ушкăна пайланса ял поселенийĕсене çул тытрĕç.
Комсомольски район администрацийĕн пуçлăхĕн ĕçĕсене пурнăçлаканĕпе Борис Каринкинпа Роза Лизакова министр Асанкасси ял поселенине çитнĕ, унти вăтам шкулти педагогсен, культура çурчĕн коллективĕсемпе тĕл пулнă. Çавăн пекех вĕсем ял çыннисене кăсăклантаракан ыйтусем çине те хуравланă.
Чăваш Республикин Патшалăх Канашĕн депутачĕ, «Газпромтранс-Чебоксары» ООО генеральнăй директорĕ Кияметдин Мифтахутдинов тата Комсомольски район администрацийĕн экономика, пурлăх хутшăнăвĕсен пайĕн начальникĕ Светлана Ульдина Тукай ял поселенийĕнче пулчĕç. Çĕнĕ Мăрат вăтам шкулĕнче ирттернĕ тĕл пулура Пĕрлехи информаци кунĕн йĕркинчи ыйтусене сÿтсе явма учительсем активлă хутшăнчĕç. Кияметдин Садртдиновичпа Светлана Геннадьевна кашни темăна тĕплĕн ăнлантарса пачĕç, ыйтусем çине хуравларĕç. Тукай ял поселенийĕн пуçлăхĕ Ольга Андреева вара ял урамĕсене тирпейлесси çинчен калаçу пуçарчĕ, вăл мĕнле йĕркепе пулса пырасси пирки чарăнса тăчĕ, çак ĕçе пурне те хастар хутшăнма чĕнсе каларĕ.
«Ачасене хуларинчен кая мар пĕлÿ парас килет, анчах кабинетсенче компьютерсем çукки тепĕр чухне темăна анлăн ăнлантарма чăрмантарать»,— пĕлтерчĕç хăйсен пăшăрханăвне вĕрентекенсем. Патшалăх Канашĕн депутачĕ çак ыйтăва правительство шайĕнче çĕклеме шантарчĕ.
«Слава картофелю» агрофирма» ООО директорсен Совечĕн председателĕ Александр Капитонов, район администраци пуçлăхĕн çумĕ — ял хуçалăх пайĕн начальникĕ Георгий Киргизов вара Кайнлăк ял поселенине çитсе курчĕç. Вĕсем «Комсомольские овощи» агрофирмăн производство базинче пулчĕç, «Слава картофелю» агрофирмăн, Хирти Мăнтăрти культура çурчĕн тата Йăлмахвари модельлĕ библиотекăн ĕçченĕсемпе куçа-куçăн калаçрĕç.
Пĕрлехи информаци кунне килнисем районта пурăнакансене те йышăнчĕç.
Источник: "Каçал Ен"