20 апреля 2011 г.
Хир тата килти сыснасем Африка чумипе чирлеме пултараççĕ. Ăна вирус пуçарса ярать, вăл хăвăрт аталанса, сарăлса организма сиенлет. Африка чумине хирĕçле вакцина хальлĕхе хатĕрлеймен, çавăнпа та çав чир ернĕ чĕр чунсем чирлесен вилеççĕ.
Çут çанталăкра Африка чумипе ытларах хир сыснисем чирлеççĕ. Вĕсенчен килти сы-снасене апат, шăна-пăван, çăхан, йытăсем урлă ерет. Вирус организма лексе чир палли курăнма пуçлани — инкубаци тапхăрĕ — 2—5 кун. Чир питĕ хăвăрт е майĕпен сарăлма пултарать. Питĕ хăвăрт сарăлнă тапхăрта сыснасем кĕтмен çĕртен чир паллисĕр вилеççĕ. Чир ерипен аталаннă чухне ÿт температури 42,5 градус таран ÿсет, выльăх йывăр сывлать, сывлăшĕ пÿлĕнет, ÿсĕрет, апат çимест, хăсать, юнлă вар витти пуçланать. Чирлĕ сыснасен хăлхисемпе сăмсисем кăвакараççĕ, выльăх вăйран кайса хăвăрт вилет.
Пĕр-пĕр фермăра Африка чуми сиксе тухрĕ пулсан, унта сыснасене пуçĕпех пĕтермелле, çунтарса сиенсĕрлетмелле, витесене тасатса дезинфекци тумалла. Ытти регионсенчен тырă, комбикорм е утă илсе килме е илсе тухма пахалăх, ветеринари сертификачĕ илмелле.
Хир тата килти сыснасен виллисене асăрхасанах ветеринари станцине пĕлтерме ыйтатпăр.
Африка чумине Чăваш Республикине кĕртес мар тесе çак ĕçсене тумалла:
— сысна фермисене хупă режимпа ĕçлеттермелле;
— витесене дезинфекцилемелле;
— столовăйсемпе ресторансенчи апат юлашкисене тепĕр хут пĕçернĕ хыççăн çеç сыснасене çитерме юрать тата ытти те.
Çак чир ан сарăлтăр тесе республикăра «хĕрÿ лини» те ĕçлет. 8(8352)52-72-18 телефонпа шăнкăравласа е rsnadzor21@mail.ru электронлă адреспа пĕлтерме пултаратăр. Хыпарсене çак адреспа ярса парăр: 428014, Шупашкар хули, Крупская урамĕ, 9-мĕш çурт.
Источник: "Каçал Ен"