16 апреля 2011 г.
Пĕлтĕрхи тата кăçалхи çул пĕрлешÿллĕ хуçалăхсене те, уйрăм çынсене те мăйракаллă шултра выльăха çеç мар, сыснасене те хĕл каçарма, вĕсенчен продукци илме çăмăл килмерĕ. Утă-улăм, çăнăх, тырă хывăхĕ çитменни чылай çĕрте палăрчĕ. Апла пулин те ял хуçалăх предприятийĕсем, уйрăм хуçалăхсем çухалса каймарĕç. Тĕрлĕ майсем тупса выльăх апачĕ туянаççĕ. Республика шайĕнчи кăтартусемпе танлаштарсан пирĕн район япăх мар ĕçлесе пырать. Кашни ĕнерен сĕт суса илес енĕпе пĕлтĕрхи çак вăхăтри кăтартусенех çитейместпĕр. Иртнĕ çулхи апрель уйăхĕнче ял хуçалăх предприятийĕсемпе фермер хуçалăхĕсем кашни ĕнерен 14-шар килограмм сĕт сунă пулсан, кăçал сăвăм 12,3-шер килогрампа çеç танлашать. «Сюрбеево» ОООра ĕнесем талăкра 17,8-шар килограмм, «Рассвет», «Слава» ЯХПКсенче 16,3—14,3-шер килограмм сĕт антараççĕ.
Яланах район шайĕнче малта пынă «Заря» хуçалăх чи кайри вырăна анса ларни пăшăрхантарать (кашни ĕнерен 7,5 килограмм анчах).
Туса илнĕ сĕте халăх кăмăлтан пĕрлешÿллĕ хуçалăхсене сутать. Талăксерен ял хуçалăх предприятийĕсем уйрăм хуçалăхсенчен 16730 килограмм сĕт пуçтараççĕ.
Ку енĕпе уйрăмах «Урожай» колхоз (3260 килограмм), «Асаново» ял хуçалăх предприятийĕ (2850 килограмм) аван тăрăшаççĕ. Хăш-пĕр çĕрте темĕнле тăрăшсан та выльăхсем çăва ырханланса тухма пултараççĕ. Çавăнпа та кая юлмасăр кирлĕ мерăсем йышăнмалла.
Источник: "Каçал Ен"