13 апреля 2011 г.
Кашни вĕренÿ çулĕнче, йăлана кĕнĕ тăрăх, Çĕнĕ Мăрат вăтам шкулĕнче Чечен вăрçинче паттăррăн пуçне хунă Леня Борисова асăнса волейбол турнирĕ ирттереççĕ. Вăл Çĕнĕ Мăрат каччи. Кăçал та ăна асăнса ăмăрту иртрĕ.
Унта пурĕ ултă команда хутшăнчĕ. Пуçтарăннисене шкул директорĕ А.С.Борисов кĕскен Леня пурнăçĕпе паллаштарчĕ.
Ăмăрту хĕрÿ иртрĕ, пурте тăрăшса вылярĕç. Çĕнĕ Мăрат каччисене çитекенни пулмарĕ. Шкул команди те, ял çамрăкĕсем те пĕрремĕш вырăнсене çĕнсе илчĕç. Вĕренекенсем хушшинче 2-мĕш вырăнта — Шурут, 3-мĕшĕнче — Патăрьел районĕнчи Первомайски вăтам шкулĕн спортсменĕсем. Анат Тимĕрчкасси, Тăманлă Выçли волейболисчĕсем те ăнăçлă вылярĕç, призерсем пулса тăчĕç.
Шкул поварĕсем Е.В.Шуряшкина, В.Н.Михайлова спортсменсене вĕри апатпа сăйларĕç. Командăсен ертÿçисем шкул дирекцине ăмăртăва лайăх йĕркеленĕшĕн тав турĕç.
Шкул дирекцийĕ те турнира ирттерме пулăшнăшăн Комсомольскинчи налук инспекцийĕн начальникĕн çумне Г.Н.Филиппова, «Промкерамика» УАО тĕп пуçлăхне В.Г.Васильева, Çĕнĕ Мăрат лесничествин пуçлăхне З.Н.Истратие, Çĕнĕ Мăратри йывăçран япаласем туса кăларакан комбинат директорне А.Г. Чернова, «Луч», «Заря», «Пайгас» ял хуçалăх кооперативĕсен ертÿçисене Н.М.Иванова, Л.А. Киргизова, В.И.Фадеева пĕтĕм чун-чĕререн тав тăвать.
Источник: "Каçал Ен"