13 апреля 2011 г.
Кĕçĕн Çĕрпÿелĕнчи культура çуртĕнче чылай çул ĕçлетĕп ĕнтĕ. Пирĕн тăрăхри çынсем юрă-ташăпа туслă. Хам та вĕсенчен юласшăнах мар. Çавăнпа, тивĕçе туллин пурнăçлас тесе, тĕрлĕ концертсем хатĕрлесе ял халăхне савăнтарма тăрăшатпăр. Культура çурчĕ çумĕнчи ансамбле чылай çамрăк çÿрет, спектакльсенче выляма юратакансем те сахалах мар. Вĕсенчен чи пултаруллисенчен пĕрин çинчен вара район хаçатĕнче çырасах терĕм. Вăл — Юлия Соколова, Кĕçĕн Çĕрпÿел вăтам шкулĕнче 10-мĕш класра вĕренет. Пултаруллă хĕр ача сакăр предметпа районти олимпиадăсене хутшăнчĕ. Чăваш чĕлхи, истори предмечĕсемпе пĕрремĕш вырăнсене çĕнсе илчĕ. Физика, астрономи, биологи, обществоведени, экологи, физкультура предмечĕсемпе те олимпиадăсенче чи пултаруллисен шайĕнче тăрать. Юльăн класс руководителĕ — математикăпа ачасене пĕлÿ паракан Маргарита Вениаминовна Григорьева.
Мана вара çак хĕр ачан сцена çинчи пултарулăхĕ савăнтарать. Юрлама тытăнсан унăн сасси кашни çынна тыткăнлать, чĕрисенче ăшă туйăм çуратать. Пĕлтĕр Юля районти вырăс халăх юррисен фестивалĕнче пĕрремĕш вырăн йышăнчĕ. «Кĕтне кĕввисем» конкурсра та палăрчĕ, виççĕмĕш вырăна тивĕçрĕ. Республикăра иртекен «Чаршав уçăлсан» фестивале те хутшăнчĕ.
Пултаруллă хĕр ачан малашлăхĕ пысăк, анлă та такăр çул сунар Юльăна.
Источник: "Каçал Ен"