09 апреля 2011 г.
«Искра» колхоза çитсен Т.Л.Мартынова агрономпа тĕл пултăмăр. Кăçалхи çур аки ыйтăвне хускатсан, акă мĕн каласа пачĕ Татьяна Леонидовна.
— Нумаях пулмасть хуçалăхра техника тĕрĕслевĕ иртрĕ. Комисси тракторсем, автомашинăсем, сÿремелли, акмалли агрегатсем пĕтĕмпех юсавлисен шутĕнче тăнине палăртрĕ. Пурте вĕсем çур акине тухма пултараççĕ. Механизаторсем те çителĕклĕ. Пилĕк сеялка пур, пĕрне кăçал туяннă. Уй-хире Владимир Кудряшов, Александр Лебедев, Николай Квасов, Владимир Мукшин, Николай Воробьев агрегачĕсем тухаççĕ.
Иртнĕ çул кĕрхи культурăсене 125 гектар çинче акса хăварнăччĕ. Калчасем аван хĕл каçнă. Кăçалхи çур акинче вара 250 гектар тулă, 145 гектар урпа, 25 гектар сĕлĕ тата пĕр çул ÿсекен курăксене 145 гектар çинче акса хăвармалла. 280 гектар çинчи нумай çул ÿсекен курăксене çĕнетме палăртнă.
Вăрлăх çителĕклĕ, 100 проценчĕпех акма юрăхлă кондицие тивĕçтерет. Унсăр пуçне кăçал Çĕрпÿри наукăпа тĕпчев институтĕнчен элита вăрлăх та туянтăмăр. Акă, çурхи туллăн «Московская-35», «Свеча» сорчĕсене 128 центнер илсе килтĕмĕр. Çавăнтанах тата сĕллĕн «Гунтер» сортне 50 центнер туянтăмăр. Урпа вăрлăхне те çĕнетес терĕмĕр. Çĕрпÿрен 77 центнер «Эльф» тата 50 центнер «Владимир» сортсене кÿрсе килтĕмĕр.
Çĕр улми вăрлăхне илес пулсан, вăл пирĕн 700 центнер пур. Унăн лаптăкне 40 гектартан чакарасшăн мар. Иртнĕ çул çĕр улмишĕн тивĕçсĕр йывăр килчĕ. Çавна пулах ĕнтĕ вăл пире 128 пин тенкĕ чухлĕ тăкак пачĕ. Ытти çулсенче «иккĕмĕш çăкăр» хуçалăха сахалах мар тупăш панă. Шанчăка çухатмастпăр-ха, çĕр улмипе çине тăрсах ĕçлес тетпĕр. Çавăнпа «Слава картофелю» агрофирмăран унăн «Ред Скарлет» сортне 15 тонна тата «Удача» сортне 5 тонна туянтăмăр.
Çунтармалли-сĕрмелли материалсем çителĕклĕ. Удобрени пĕлтĕрхи те пур, тата 10 тонна илсе килмелле, укçине куçарнă.
Çак кунсенче тырăсен вăрлăхне имçамлама пуçлатпăр. Ку ĕçе Елена Макарова, Тамара Квасова, Елена Чемешева, Лена Руссакова пурнăçлĕç. Çур акине хутшăнакан водительсем çинчен те манса каяс мар-ха. Николай Кошкинăн, Сергей Мартыновăн, Андрей Руссаковăн уй-хире вăрлăх турттармалла. Çурхи ĕçсен планĕнче çавăн пек палăртнă.
Леонид Волков инженер тăрăшулăхне те асăнмасăр хăварма çук. Вăл техникăна çĕнетсе пырассишĕн сахал мар вăй хурать,— вĕçлерĕ хăйĕн сăмахне хуçалăх агрономĕ.
Пĕтĕмлетсе каласан, хырайĕнелсем уй-хиртен пысăк тухăç илес тесех пурăнаççĕ. Çакна хуçалăхри паянхи лару-тăру уççăн çирĕплетет. Сăмах май çакна та каласа хăвармалла: Татьяна Леонидовна хăйĕн пурнăçне çĕрпе тачă çыхăнтарнă, маларах вунă çула яхăн бригадирта вăй хунă, юлашки тăватă çул агроном тивĕçне чыслăн пурнăçласа пырать.
Источник: "Каçал Ен"