02 апреля 2011 г.
Пĕлтернĕччĕ ĕнтĕ, Шупашкарта Ухсай ячĕллĕ культура керменĕнче чăваш эстрада юррисен «Кĕмĕл сасă» фестиваль-конкурсĕ иртнĕ. Унта хутшăнакансене гала-концертра Чăваш наци конгресĕн президенчĕ Геннадий Архипов тата ЧР Культура, национальноçсен ĕçĕсен, информатика политикин тата архив ĕçĕн министерствин уйрăм начальникĕ Михаил Краснов саламланă. Вĕсем çак фестиваль-конкурс наци культурине аталантарас енĕпе пысăк пĕлтерĕшлĕ пулнине, çĕнĕ талантсем тупса пама пулăшнине, тĕрлĕ регионсенчи диаспорăпа çыхăнăва çирĕплетме май панине палăртнă.
Пирĕн районтан Оксана Ласточкинасăр пуçне (иртнĕ номерте палăртнăччĕ) фестиваль-конкурса Ирина Тихонова та (Комсомольски ялĕ, сцена çинчи ячĕ Зарина) хутшăннă. Вăл Чăваш Республикин культура училищине вĕренсе пĕтернĕ. Фестивальте сцена çине Зарина «Шурă чечек çыххи» юрăпа тухнă. Ăна Татьяна Попова сăвви тăрăх Ярослав Ильин кĕвĕленĕ.
Жюрире паллă артистсем пулнă: Вячеслав Христофоров, Вячеслав Оринов, Залив Бексалин. Вĕсем Заринăн пултарулăхне пысăк хак панă. Вăл фестиваль дипломанчĕ пулса тăнă. Пултаруллă юрăçă парне вырăнне хăйĕн юррисене аранжировка тума ирĕк паракан сертификата тивĕçнĕ.
Пирĕн район хĕрĕсем республика шайĕнче те палăрни савăнтарать. Вĕсем малашне те хăйсен пултарулăхне ÿстерсе пырасса, куракансене çепĕç те тыткăнлакан юрăсем парнелессе шанатпăр.
Фестиваль-конкурсра Пушкăртстан, Тутарстан республикисенчен, Ульяновск, Саратов, Тюмень облаçĕсенчен юрăçăсем хутшăннине шута илсен унăн пĕлтерĕшĕ чăнах та пысăк ĕнтĕ. Çамрăксем унта пĕр-пĕрин пултарулăхĕпе паллашнă, вĕреннĕ, туслашнă. Çакăн пек конкурссем ялсенчи çамрăк талантсене хавхалантараççĕ.
Источник: "Каçал Ен"