02 апреля 2011 г.
Совет Союзĕн гражданинĕ Юрий Алексеевич Гагарин тĕнчере пĕрремĕш хут космос вĕçевĕнче пулнăранпа кăçалхи апрелĕн 12-мĕшĕнче 50 çул çитет. Тĕнче пĕлтерĕшлĕ сумлă ĕçе хакласа 2011 çула Космонавтика çулĕ тесе йышăннă.
Çитес çул пирĕн мухтавлă ентеш Андриян Григорьевич Николаев космоса малтан çул уçакансенчен пĕри, виççĕмĕш космонавт, космоса пĕрремĕш хут çĕкленнĕренпе 50 çул çитет.
Андриян Николаев чăваш çĕр-шывĕн, чăваш халăхĕн ят-сумне тĕнче шайне çĕкленипе эпир мухтанма та пултаратпăр. Маларах чăваш çĕр-шывĕ ăçтарах вырнаçнине СССРăн пур регионĕсенче пĕлмен те. Халĕ Николаев космонавт çĕр-шывне, чăваш халăхне тĕнче шайĕнче пĕлеççĕ.
Мухтавлă ентеше, икĕ хут Совет Союзĕн Геройне, А.Г.Николаев генерал-майора ĕмĕр асăнса пурăнма кăçал Шупашкарта скульптура композицийĕ лартма йышăннă. Чаплă палăка халăхран пухнă укçапа тăвасшăн. Çак пуçарăва республика Президенчĕ М.В.Игнатьев ырланă, укçа пухас ĕçе пикенме хушнă.
Палăка А.Г.Николаев космоса малтан çĕкленнĕренпе 50 çул çитнĕ вăхăта, 2012 çулхи август уйăхне, туса пĕтерме палăртнă. Укçа пухас ĕçе кăçалхи çу уйăхĕн 1-мĕшĕччен вĕçлемелле.
Ветерансен республикăри канашĕ ветерансен вырăнти организацийĕсем ку ĕçе активлă хутшăнасса шанса тăрать. Пуçламăш организацисенче сăваплă ĕç валли укçа пухма тытăннă та ĕнтĕ. Районти организацисемпе предприятисем, предпринимательсем, уйрăм çынсем те çак ĕçрен аякка тăрса юлас çук.
Палăк валли укçа хывнă кашни çын, кашни хуçалăх «палăка тăвас ĕçе эпĕ те хутшăннă» тесе мăнаçланма пултартăр.
Источник: "Каçал Ен"