02 апреля 2011 г.
Хĕл парăнмасть пулин те çанталăк çуркунне çитнине систерет. Çул çинчи кÿлленчĕксем, çурт тăрринчи тумлам пăрĕ сем çурхи ака-суха ĕçĕсене хатĕрленмеллине асăрхаттараççĕ.
Район администрацийĕн ларусен пысăк залĕнче мартăн 29-мĕшĕнче иртнĕ канашлу та çав ыйтупа пулнă. Ун ĕçне ял хуçалăх предприятийĕсемпе фермер хуçалăхĕсен ертÿçисем, специалисчĕсем хутшăннă. Канашлура çуракипе çыхăннă чылай ыйтăва пăхса тухнă. ЧР ял хуçалăх министрĕн экономика енĕпе ĕçлекен çумĕ Н.Н.Виноградова республикăри ял хуçалăх отраслĕнчи лару-тăрупа, иртнĕ çул пурнăçланă ĕçсемпе, малашнехи тĕллевсемпе паллаштарнă.
Район администрацийĕн ял хуçалăх пайĕн тĕп агрономĕ И.Х. Минетуллин хăй сăмахĕнче пĕлтĕрхи ĕç пĕтĕмлетĕвĕсем çинче тĕплĕн чарăнса тăнă, вăл е ку ыйтупа тĕслĕхсем илсе кăтартнă. Лайăх вăрлăхсăр пысăк тухăç илеймĕн. Çак ыйтупа «Россельхозцентр» ФГУн Чăваш Республикинчи филиалĕн специалисчĕ Е.А.Соколова тухса калаçнă. Удобренипе усă курнин пĕлтерĕшĕ пирки Хусанти «Агросоль» ЗАО директорĕ, ял хуçалăх наукисен кандидачĕ М.Д.Кадыров ăнлантарса панă. Чăваш патшалăх ял хуçалăх академийĕн наукăпа тĕпчев институчĕн директорĕн çумĕн, ял хуçалăх наукисен кандидачĕн А.А.Афанасьевăн сăмахĕнче вăрлăх ыйтăвĕ тĕп вырăн йышăннă.
«Восток» ООО (Л.А.Смирнов), «Сингента» ООО (Г.В.Тихонов), «Агрорус-Волга» ООО (В.И.Васильев) представителĕсем ÿсен-тăран тăшманĕсене (чир-чĕре, сиенлĕ хурт-кăпшанка, çумкурăка) хирĕç кĕрешмелли наркăмăшлă им-çамсен ассортименчĕпе паллаштарнă. Хуçалăх ертÿçисене пĕрле ĕçлеме сĕнÿсем панă.
Канашлăва килнисем республика шайĕнче ĕçлекенсене чылай ыйту панă, тулли хуравсем илнĕ.
Районти пур формăллă ял хуçалăх предприятийĕсем те çурхи ака-суха ĕçĕсене хатĕрленеççĕ. Çапах та йывăр лару-тăрусем те пур. Вăрлăх, удобренисем, им-çам, çунтармалли-сĕрмелли материалсем илсе килмелле. Тракторсене тата кăкарса ĕçлемелли агрегатсене тĕплĕн юсаса хатĕрлемелле. Çак шухăшсене палăртнă район администрацийĕн ял хуçалăх пайĕн начальникĕ Г.М.Киргизов. Пирĕн районти ял ĕçченĕсем кашни çĕр лаптăкĕпех тухăçлă усă курма тăрăшнă. Ака-сухана та, агротехника ĕçĕсене те вăхăтра пурнăçланă. Иртнĕ çулхи шăрăх çанталăк чылай ял хуçалăх предприятине йывăрлăха кĕртсе ÿкернĕ пулин те, кăçал çуракине ăнăçлă ирттерессе шанма пулать.
Источник: "Каçал Ен"