02 апреля 2011 г.
Пирĕн районта спорта тата физкультурăна кăмăллакансем сахал мар. Сывă пурнăç йĕркине тытса пыракансем хĕллехи вăхăтра йĕлтĕр çине тăрса чупаççĕ, хоккей площадкисенче иртекен ăмăртусене хутшăнаççĕ. Çуллахи спорт вăййисене кăмăллакансем те чылайăн.
Урмаел енчен килнĕ чухне сулахайра юлакан капмар çурта пурте асăрханă пулĕ. Тепĕр 2—3 уйăхран çак физкультурăпа спорт комплексĕ алă-кĕсене яри уçĕ.
Эпĕ унта пынă чухне ĕç вĕресе тăратчĕ. «Паянхи кун комплекса хута ярассишĕн 36 çын ырми-канми тăрăшать. Малярсем, плиточниксем, отделочниксем тата ыттисем те юлашки «штрихсене» тăваççĕ. Ĕçсене пĕтерсе пыратпăр. Кирлĕ спорт инвентарĕсене илсе килнĕ. Бассейна та шыв ярса тултармалли кăна юлнă»,— пĕлтерчĕ А.Ю.Антонов прораб. Алексей Юрьевич пÿлĕмсен алăкĕсене те уçса кăтартрĕ.
Комплексра халĕ Вăрмар, Канаш тата Шупашкар районĕсенчен килнĕ рабочисем ĕçлеççĕ. Ентешсем те пур.
Тĕслĕхрен, Ольга Филиппова Шупашкарти «ПАМИС» ОООра облицовщик-плиточникра нумай çул тăрăшать. «Республикăри чылай спорт комплексĕ тунă çĕрте ĕçлеме тÿр килчĕ. Комсомольскинче туни уйрăмах асăмра юлĕ. Мĕншĕн тесен ăна уçнă кунсенче эпĕ пенсие каятăп»,— терĕ вăл. Унпа юнашар тăрăшакан Сергей Родзянов вара — Вăрмар каччи (сăн ÿкерчĕкре). Унăн ентешĕ Александр Борисов иртнĕ çулхи декабрь уйă-хĕнче объектра ĕçлеме пикеннĕ. Вăл тăрăшуллă пулнине Алексей Антонов прораб та çирĕплетрĕ.
«Пурте маттур, кашниех чунтан тăрăшать. Лайăххисенчен те лайăххисем пур. Никама та уйăрса мухтас килмест. Уйрăмах Алексей Сергеев, Александр Дмитриев бригадирсем, Татьяна Яковлева отделочник-плиточник чунĕсене парса ĕçлеççĕ»,— терĕ мана ăсатса А.Антонов.
Апрель уйăхĕн варринче кунта ĕçлекенсем комплекс йĕри-тавра тирпей-илем кÿме пуçлĕç.
«Кĕтне» комплекса Республика кунĕнче, июнĕн 24-мĕшĕнче, уçма палăртаççĕ, унччен пĕтĕм ĕçе вĕçлемелле. Комсомольскисен тинех хăйсен сывлăх центрĕ пулĕ.
Источник: "Каçал Ен"