30 марта 2011 г.
Мартăн 25—26-мĕшĕсенче Шупашкарта Пĕтĕм чăвашсен «Кĕмĕл сасă» ятлă эстрада юррисен ХII фестиваль-конкурсĕ иртнĕ. Ăна чăваш наци конгресĕ тата Чăваш Республикинчи çамрăксен «Хастар» обществăлла организацийĕ йĕркеленĕ. Вĕсене ЧР Культура, национальноçсен ĕçĕсен, информаци политикин, архив ĕçĕн министерстви тата Чăваш Республикинчи Халăх творчествин çурчĕ пулăшса пынă.
Унта хамăр республикăри, Пушкăртстан, Тутарстан республикисенчи, Ульяновск, Саратов, Тюмень облаçĕсенчи 16—35 çулсенчи чăваш юррисене юрлакансем 26-ăн хутшăннă.
Пĕтĕмлетÿсем тунă чухне жюри конкурса хутшăнакансем мĕнле юрланине, юрă сăмахĕсемпе кĕввине, сцена çинче хăйсене мĕнле тытнине тата тумтир хăйне евĕрлĕхне те шута илнĕ. Çĕнтерÿçĕсем хушшинче пирĕн район хĕрĕ Оксана Ласточкина пулни те савăнтарать. Вăл III степеньлĕ Диплома çĕнсе илме пултарнă. Унăн ăсталăхĕ татах та ÿссе пырасса шанатпăр, ăнăçу сунатпăр, çĕнĕ çитĕнÿсем кĕтетпĕр.
Источник: "Каçал Ен"