26 марта 2011 г.
Геннадий Викторов подполковник çырнă «Сыны Отечества: воспоминания и размышления» кĕнекесене (тăватă кĕнеке) кăсăкланса вуласа тухрăм. Кĕнекесем Чăваш Республикинче çуралса ÿснĕ, халĕ Мускавра тата Мускав облаçĕнче пурăнакан-ĕçлекен офицерсен пурнăçĕпе, ĕçĕ-хĕлĕпе паллаштараççĕ. Генералсем, адмиралсем тата ытти офицерсем «Сыны Отечества» юлташлăх йĕркеленĕ. Унта пĕрлешнĕ офицерсемпе ытти паллă çынсем Чăваш çĕр-шывĕпе тачă çыхăну тытаççĕ. Çавăн пекех республикăра патриот туйăмне ÿстерсе çирĕплетес тĕллевпе ирттерекен мероприятисене активлă хутшăнаççĕ. Вĕсем çамрăксемпе тĕл пулса Раççей çарĕн пурнăçĕпе, ĕçĕ-хĕлĕпе, Чăваш Енĕн мухтавлă çыннисем çинчен каласа парса çĕр-шыва юратма, чăн-чăн патриот пулма хавхалантараççĕ.
Çар çыннисен пурнăçĕпе, вĕсен службăри ĕçĕсемпе паллашнă хыççăн манăн çакăн пек пĕтĕмлетÿ тăвас килет. Генералсенчен, адмиралсенчен, полковниксенчен тата паллă ытти офицерсенчен ытларахăшĕ ялта çуралса ÿснĕ. Пĕчĕкренех ĕçе хăнăхнă, йывăрлăхсене çĕнтерме пултарнă. Вĕсенчен нума-йăшĕ шкулта питĕ тăрăшса вĕреннĕ, ылтăн е кĕмĕл медальсемпе пĕтернĕ.
Автор Андриян Николаев летчик космонавт, Геннадий Никандрович Волков академик çинчен те тĕплĕн каласа парать.
Кĕнекесем Тăван çĕр-шыва юратма, патриотсем пулма вĕрентеççĕ. Шкулсенче Паттăрлăх урокĕсем ирттернĕ чух Г.Викторов кĕнекисем усă парасса шанатăп.
Паянхи кун кĕнеке лавккисенче, киосксенче темĕн тĕрлĕ кĕнеке те пур. Вĕсенчен ытларахăшĕ — юрату, криминал темипе. Г.Викторовăн кĕнекисем пеккисене сайра куратăн. Ÿсекен ăрăва вара шăпах патриотизм туйăмне çуратма пулăшаканнисем кирлĕ. Çак кĕнекесене вуласа тухма сĕнес килет.
Источник: "Каçал Ен"