26 марта 2011 г.
Пирĕн районти вĕренекенсем пултаруллă. Вĕренÿре те палăрса тăраççĕ, спортра та ăнăçусем тăваççĕ. Юрă-ташăра та маттур вĕсем. Çакна районта çеç мар, республикăра иртнĕ конкурссен, олимпиадăсен, фестивальсен призерĕсем пулни те çирĕплетет.
Нумаях пулмасть Патăрьел районĕнчи Тутар Сăкăт ялĕнче республикăри IV фестиваль иртнĕ. Г.Тукая халалланă мероприятие чылай çĕртен килнĕ. Вăл хăйнеевĕрлĕхĕпе палăрса тăрать. Унта ачасем тутарсен паллă поэчĕн творчествине пĕлнипе, вĕсемпе усă курса сцена çине тухса пĕр-пĕр инсценировка тунине хакланă. Пирĕн районти вĕренекенсем те айккинче юлман. Чĕчкен пĕтĕмĕшле пĕлÿ паракан тĕп шкулĕнче вĕренекенсем Г.Тукай произведенийĕсем тăрăх инсценировка лартса панă. Вĕренекенсем тĕрлĕ номинацисемпе Дипломсене тата Хисеп грамотисене тивĕçнĕ. Хăйсен пултарулăхне республика шайĕнче те кăтартма пултарни пархатарлă.
Источник: "Каçал Ен"