23 марта 2011 г.
«Каçал ен» хаçатăн кăçалхи мартăн 12-мĕшĕнче тухнă номерне илсен чун хăпартланса кайрĕ. «Патриот» рубрикăпа пичетленнĕ «Пĕр-пĕрне манманни паха» статьяри сăн ÿкерчĕкре хама палласа илтĕм. Çар службинче тăнăранпа 50 çул иртнĕ пулин те çав вăхăтсем асран тухмаççĕ. С.И.Костров вара хăйĕн çырăвĕпе вăл кунсене тепĕр хут аса илтерчĕ.
1956 çулта çара кайнă эпĕ. Сăн ÿкерчĕкри юлташсемпе (эпĕ хыçалти ретре, иккĕмĕш тăратăп) пĕрле салтак пăттине çинĕ. Августра ăшă хĕвеллĕ кун тăратчĕ. Çав çулхине районти пĕчĕк Виçпÿрт ялĕнче те 18 çамрăк ÿссе çитĕнчĕ. Эпир Пимулла Абусевпа пĕр вăхăталла çара тухса кайрăмăр. Канашри çар ĕç комиссариатĕнче савăнăçлă митинг пулчĕ. Пысăк пуçлăхсем пире службăна чыслă ирттерме ырлăх-сывлăх сунчĕç. Пирĕн те хавхалану пулнă ĕнтĕ. Анчах та тÿрех салтак тумĕ тăхăнаймарăмăр-ха. Малтан пире утă хатĕрлеме, тырă пуçтарма илсе кайрĕç. Унта тăрăшнă хыççăн çеç Хусан хулинче салтак тумĕ тăхăнтартрĕç. Тревогăпа тăратса Венгрие илсе кайрĕç. Вăл вăхăтра тĕнчере политика енĕпе кăткăслăхсем пулнă. Пирĕн çĕр-шывра пурăнакансем вĕсем çинчен пĕлмен те. Эпир ют çĕр-шывра пулсан та яланах сыхă тăнă.
Ятарласа вĕрентнĕ хыççăн мана аслă сержант званийĕ пачĕç. Салтак служби Бердичев хулинче иртрĕ. Унта хам ума лартнă тĕллевсене чыслăн пурнăçласа пынă тесе шутлатăп.
РЕДАКЦИРЕН: Петр Константинович çартан таврăнсан районти яваплă чылай çĕрте ĕçленĕ. «Комсомольский» совхозра партком секретарĕнче, бригадирта, районти йăла ыйтăвĕсене тивĕçтерекен комбинат директорĕнче тăрăшнă.
Источник: "Каçал Ен"