23 марта 2011 г.
Сывлăх — çыннăн чи пысăк пуянлăхĕ, çавăнпа ăна упрама мĕн пĕчĕкрен вĕрентмелле. Гигиенăна пăхăнма, кĕлеткене пиçĕхтерме, физкультурăпа спорта юратма хăнăхтармалла. Сывă пурнăç йĕркине тытса пыни этеме ÿт-пĕвпе çеç мар, кăмăл-сипет тĕлĕшĕнчен те сывлăхлă пулма май парать, ĕçлес пултарулăха ÿстерет. Çакна тĕпе хурса йĕркелерĕç те ĕнтĕ «Каçал ен» хаçат ĕçченĕсем мартăн 20-мĕшĕнче хĕллехи спорт сезонĕ хупăннă ятпа ăмăрту.
Чи малтанах район администрацийĕн пуçлăхĕ Г.Ф.Волков, «Каçал ен» хаçатăн тĕп редакторĕ Л.Г.Шуряшкина, район администрацийĕн вĕрентÿ пайĕн тĕп специалисчĕ Е.А.Тихонов ăмăртăва хутшăнакансене спорт уявĕ ячĕпе саламларĕç, эстафетăра ăнăçу сунчĕç.
Ушкăн хыççăн ушкăн йĕлтĕр çине тăчĕ. Чи малтанах районти пĕтĕмĕшле пĕлÿ паракан шкулсенче вĕренекенсем старта тухрĕç. Хĕрÿ тупăшура хырхĕррисем чи пултаруллисем пулчĕç, пĕрремĕш вырăна тухрĕç. Чĕчкенсемпе анаттимĕрчкассисем иккĕмĕшпе виççĕмĕш вырăнсене çĕнсе илчĕç.
Вăтам шкулсем хушшинче аслăчурачăксене çитекен пулмарĕ, вĕсем пĕрремĕш вырăна тухрĕç. Иккĕмĕш вырăна кĕçĕнçĕрпÿелсем, виççĕмĕшне нĕркеçсем йышăнчĕç.
Ăмăртура организацисемпе предприятисен, ял поселенийĕсен 4 команди старта тухрĕ. Çак ушкăнра чупакансене пăхма пушшех те кăсăклă пулчĕ. Вĕсенчен чи маттурри Çĕнĕ Кипеç ялĕнчи Васильевсен çемье команди пулчĕ. Команда капитанĕ Николай Иванович Васильев ывăлĕпе кинĕсĕр пуçне 2-мĕш класра вĕренекен мăнукне Катьăна та йĕлтĕр çине тăратнă. Юлашки тапхăрта хĕр ача ытти йĕлтĕрçĕсене чылай хыçала хăварса пĕрремĕш чупса тухрĕ. Иккĕмĕш вырăна Тукай ял поселенийĕн спортсменĕсем çĕнсе илчĕç. Виççĕмĕш вырăна вара ял поселенийĕсен пуçлăхĕсен команди йышăнчĕ. Шел пулин те, çак мероприятие Александровка, Тукай, Кайнлăк, Комсомольски тата Урмаел ял поселенийĕсен пуçлăхĕсем кăна хутшăнчĕç. Ыттисем мĕнле сăлтава пула айккине тăрса юлчĕç-ши?
Юлашкинчен çĕнтерÿçĕ-командăсене Хисеп грамотисемпе куçса çÿрекен кубок парса чысларĕç. Виçĕ ушкăнра пĕрремĕш вырăна тухнă командăсем 2011 çулăн иккĕмĕш çур çулĕнче «Каçал ене» тÿлевсĕр илме тивĕç пулчĕç.
Источник: "Каçал Ен"