23 марта 2011 г.
Мартăн 18-мĕшĕнче район администрацийĕн ларусен залĕнче депутатсен Пухăвĕн черетлĕ ларăвĕ иртрĕ. Кун йĕркине 2 ыйту кĕртнĕ. Вĕсем иккĕшĕ те депутатсен Пухăвĕ маларах тунă йышăнусене улшăнусем кĕртессипе çыхăннă. Пĕрремĕш ыйтупа финанс пайĕн начальникĕ Ирина Васильева сăмах илчĕ. Ирина Геннадьевна Комсомольски районĕн 2011 çулхи бюджетĕнче епле улшăнусем пуласса депутатсене тĕплĕн ăнлантарса пачĕ. Районăн кăçалхи бюджечĕ 300 млн тенкĕпе танлашмалла, анчах дефицит шайĕ те пĕчĕкех мар. «Хамăр илекен тупăш шайне упраса хăварма тăрăшмалла. Район çыннисен пурлăхĕсене, çĕр пайĕсене регистраци органĕсенче харпăрлăха çирĕплетессине тивĕçлĕ шайра йĕркелесен çеç çакна пурнăçлама пултарăпăр»,— терĕ район администрацийĕн пуçлăхĕ Геннадий Волков ял поселенийĕсен ертÿçисене.
Район администрацийĕн ĕçĕсен управляющийĕ Юрий Скворцов депутатсен Пухăвĕн 2008 çулхи июнĕн 6-мĕшĕнчи 8 /1776 номерлĕ йышăнăвĕнче кăçалтан пулакан улшăнусемпе паллаштарчĕ.
Депутатсем кун йĕркине кĕртнĕ ыйтусене сÿтсе явса тивĕçлĕ йышăнусем турĕç, вĕсене сасăласа çирĕплетрĕç.
Источник: "Каçал Ен"