16 марта 2011 г.
Пирĕн районта пурăнакансем йĕлтĕр спортне кăмăллаççĕ. Çакна хĕллехи вăхăтра иртекен ăмăртусем те çирĕплетеççĕ. Черетлĕ тупăшу СССР чемпионкин В.Чернован призĕшĕн Аслă Чурачăк ялĕнче иртрĕ. Унта пĕтĕмĕшле илсен шкул ачисем çеç хутшăнчĕç. Аслисем йĕлтĕр çине тăма манса кайнă-ши.
Вăтам шкулта вĕренекен арçын ачасем хушшинче нĕркеçсем (Н.Волков, С.Петров, Г.Кириллов) малти виçĕ вырăна йышăнчĕç.
Хĕрсем хушшинче Аслă Чурачăк вăтам шкулĕнче вĕренекен А.Шикаревăна çитекенни пулмарĕ. Асанкассисем, Н.Аверкина тата Т.Филиппова, иккĕмĕш тата виççĕмĕш вырăнсем йышăнчĕç.
Тĕп шкулта вĕренекенсем хушшинче те тупăшу хĕрÿ иртрĕ. Пурте дистанцие ăнăçлă кăтартусемпе вĕçлес тесе ăнтăлчĕç. Кунта малти ретре Г.Морозов (Хырхĕрри), И.Айнетдинов (Чĕчкен), А.Никифоров (Хырхĕрри) пулчĕç.
Хĕрсенчен Л.Мухаметшина, Р.Алимова (иккĕшĕ те Чĕчкенти тĕп шкул), А.Волкова (Асанкасси вăтам шкулĕ) палăрчĕç.
Ăмăртăва лайăх йĕркеленĕ. Анчах та предприятисемпе организацисем, учрежденисем тупăшăва командăсем тăратманни илемсĕр. Чĕчкен ял поселенийĕнче шкул ачисемсĕр пуçне аслăраххисем йĕлтĕр йĕрĕ çине тăма пултараççех пулĕ. Çĕнтерни мар, хутшăнни паха. Çамрăксене ырă тĕслĕх кăтартмалла. Хырхĕрринчи Н.Ятманов, Çĕнĕ Кипеçри Н.Васильев, Çĕнĕ Мăратри Г.Шельтямов ăмăртура малти вырăнсене çĕнсе илчĕç. Чăннипех те маттур вĕсем. Чăн-чăн спорт тусĕсем.
Источник: "Каçал Ен"