12 марта 2011 г.
Çакăн пек ятпа иртрĕ Комсомольскинчи культурăпа кану центрĕнче мартăн 3-мĕшĕнче асаннесен конкурсĕ. Ăна Пĕтĕм тĕнчери хĕрарăмсен кунне халалларĕç.
Кам-ши çемьере асанне? Вăл психолог та, учитель те... Пур наукăсен кандидачĕ те. Хăйсен ăсталăхне кăтартрĕç те ĕнтĕ сцена çине тухса маттур та пултаруллă асаннесем.
Кану каçне культура ĕçченĕ Валентина Тимофеева уçрĕ, программăна вăлах ертсе пычĕ. Пухăннисене саламласа район пуçлăхĕ Евгений Карпеев, районти хĕрарăмсен совечĕн председателĕ Валентина Курицына сăмах тухса каларĕç, конкур-сантсене ăнăçу сунчĕç.
Конкурсăн пĕрремĕш пайĕнче асаннесем хăйсемпе паллаштарчĕç. Тупăшăва улттăн хутшăннă: Галина Семеновна Герасимова (Нĕркеç), Анфиса Деомидовна Емельянова (Хырхĕрри), Ольга Ильинична Басникова (Çĕнĕ Мăрат), Валентина Владимировна Васильева (Çĕнĕ Шăхран), Вера Алексеевна Шагарова (Йÿç Шăхаль), Елена Геннадьевна Константинова (Хирти Мăнтăр).
Ертсе пыракан конкурсăн иккĕмĕш пайĕнче асаннесен тавра курăмне тĕрĕслерĕ, кăткăс ыйтусем пачĕ. «Пĕрремĕш мăнук миçемĕш çулта пĕрремĕш класа кайнă?», «Кĕçĕн мăнукăн пĕрремĕш сăмахĕ мĕнле пулнă?», «Юратнă юмах мĕнли-ши?», «А.С.Пушкинăн асамлă юмахĕсем» — çак тата ытти ыйтусем çине асаннесем тулли хуравсем пачĕç.
Малалла вĕсем сцена çине хăйсем пĕçернĕ тутлă апат-çимĕçпе тухрĕç. Куракансене тата жюри членĕсене Г.Герасимова кукăльпе тата ăшă сĕтпе, А.Емельянова — çăмахпа, О.Басникова — çĕр улми тата аш-какай куклипе, В.Шагарова — çĕр улмипе тата уйранпа, В.Васильевăпа Е.Константинова хуплупа сăйларĕç.
Çип пĕтĕрсе ăмăртни те залра ларакансене килĕшрĕ.
Мĕнле конкурс-ха вăл юрă-ташăсăр? Юлашкинчен асаннесем юрласа ăмăртрĕç, такмаксем каласа та тĕлĕнтерчĕç.
Жюри членĕсем пĕтĕмлетÿ тунă хыççăн О.И.Басникова конкурс çĕнтерÿçи пулса тăни паллă пулчĕ. Г.Герасимова «Чунпа чи çирĕппи», А.Емельянова «Ылтăн алăллă асанне», В.Васильева «Чи тараватли», В.Шагарова «Самая экстравагантная», Е.Константинова «Чи шанчăкли, ырă кăмăлли» номинацисенче çĕнтерÿçĕсем пулчĕç, хаклă парнесене тивĕçрĕç.
Районти социаллă хÿтлĕх пайĕн начальникĕ Ираида Никитина, жюри членĕ пулнăскер, кулуарта пĕр-икĕ сăмах каларĕ: «Конкурсантсем питĕ тĕплĕ хатĕрленнĕ. Пурте талантлă, тăрăшуллă. Сцена çине тухса ăмăртниех вĕсен маттурлăхне çирĕплетет. Сăмахран, конкурса хутшăннă Е.Константинова асанне те, анне те. Вăл хăйĕн икĕ мăнукне усрава илсе пăхса ÿстерет. Г.Герасимова ĕмĕрĕпех сывлăх хуралĕнче тăнă, паянхи кун та ун патне ял çыннисем çĕрле е ир-ирех пулăшу ыйтма пыраççĕ. Галина Семеновна вĕсене кирек хăш вăхăтра та пулăшма хатĕр». Жюри членĕсем, район администрацийĕн культура секторĕн ертсе пыракан специалисчĕ З.С.Мельникова тата Н.Н.Розова пресс-секретарь сăмах тухса каларĕç.
Пуриншĕн те паллă ĕнтĕ, спонсорсемсĕр нимле мероприяти те иртмест. Кану каçне ирттерме «Агрокабель», «Мир», «Технолидер», «Слава картофелю» агрофирма, «Кооператор», «Комсомольский хлебозавод» ОООсем, «Комсомольские овощи» ЯХПК тата ытти организацисем укçа-тенкĕ парса пулăшнă.
Источник: "Каçал Ен"