12 марта 2011 г.
Март уйăхĕнче кашни çулах пирĕн районта пурăнакансем Вырăс хĕлне савăнăçлă лару-тăрура ăсатаççĕ. Кăçал та пуш уйăхĕн 6-мĕшĕнче «Прощай, Зимушка-зима» уяв хаваслă иртрĕ.
Мероприятие район администрацийĕн пуçлăхĕ Геннадий Волков уçрĕ. Уява килнисене район пуçлăхĕ, Комсомольски райпо совечĕн председателĕ Евгений Карпеев, ял хуçалăх пайĕн начальникĕ Георгий Киргизов, капиталлă строительство тата çурт-йĕр, коммуналлă хуçалăх пайĕн начальникĕ Борис Каринкин та ăнăçу, телей тата ырлăх-сывлăх сунчĕç.
Концерта Комсомольски 1-мĕш вăтам шкулĕнче пуçламăш классенче вĕренекенсем (ертÿçи — Людмила Константинова) уçрĕç. Уяв программи анлă та интереслĕ пулчĕ. Центра пухăннисене артистсем савăк юрă-ташă парнелерĕç. Комсомольски, Аслă Çĕрпÿел, Урмаел, Асанкасси, Хырхĕрри, Шурут ял поселенийĕсенчен тата ытти çĕртен килсе çитнĕ коллективсем хăйсен пултарулăхĕпе савăнтарчĕç. Ялсенчи артистсем чăвашла, тутарла, вырăсла юрланă юрăсем таврара чылайччен янăрарĕç. Куракансене уйрăмах Асанкасси ял поселенийĕн пуçлăхĕ Николай Карпов хут купăс каласа юрлани тĕлĕнтерчĕ.
Райпо тытăмĕн сутуçисем, уйрăм предпринимательсем апат-çимĕçпе, кĕпе-тумтирпе суту-илÿ турĕç. Пуçтарăннисем вара ытларах чечексем туянни курăнчĕ.
Ватти-вĕтти те çак кун тулли кăмăлпа савăнчĕ. Кăмăл пуррисен çуна кÿлсе илемлетнĕ лашасемпе катаччи чупма та май килчĕ.
Концертпа пĕрлех чылай спорт ăмăртăвĕ иртрĕ. Район çыннисем кирек хăш тупăшура та пултаруллă пулни палăрчĕ. Райцентрта арçынсем алă вăйĕ виçессипе хĕрÿ ăмăртрĕç. Çакăнта 75 килограмм виçе таранчченхисенчен чи вăйлисем Э.Иванов, В.Калашников тата В.Антипов палăрчĕç, малти вырăнсене тухрĕç. 75 килограмран иртнисенчен вара А.Зарипов, Р.Михеев тата А.Шарифуллин чи пултаруллисен шутĕнче.
Кире пуканĕ йăтакансем те йышлăччĕ. Арçынсенчен В.Калашников, Н.Николаев, Э.Иванов турнир çĕнтерÿçисем пулчĕç. Арçын ачасенчен пирвайхи вырăнсене Комсомольски 1-мĕш вăтам шкулĕнче вĕренекенсем И.Степанов, С.Шкаблев тата Д.Самуков çĕнсе илчĕç. Сăмах май, çĕнтерÿçĕсен тренерĕ В.Калашников районти чылай ăмăртăва хутшăнса лайăх кăтартусем тăвать.
Комсомольски 2-мĕш вăтам шкулĕнче волейболла вылякансем пуçтарăнчĕç. Кубока çĕнсе илессишĕн 8 команда ăмăртрĕ. Хĕрÿ тупăшура урмаелсем — пĕрремĕш, нĕркеçсем — иккĕмĕш, шурутсем виççĕмĕш вырăнсене йышăнчĕç.
Комсомольски 1-мĕш вăтам шкулĕнче ирĕклĕ майпа кĕрешекенсен турнирĕ иртрĕ. Командăсем хушшинче Асанкасси вăтам шкулĕнче пĕлÿ пухакансем — пĕрремĕш, урмаелсем — иккĕмĕш, тукаймишерсем виççĕмĕш вырăнсене çĕнсе илчĕç. 1993 çулта тата каярах çуралнисем хушшинче 63 килограмлисенчен М.Максимов, 69 килограмлисенчен А.Тукаев, 73 килограмлисенчен Н.Миронов пĕрремĕш вырăнсене тухрĕç. Çавăн пекех 1996—1997 çулсенче çуралнисенчен тĕрлĕ виçесенче чи пултаруллисем И.Галзановпа Ю.Малышев (Комсомольски), Н.Шакуровпа Р.Гимадиев (Тукай Мишер), С.Григорьев, А.Артемьев тата Ю.Степанов (Аслă Чурачăк), Г.Школьников, А.Прокопьев (Асанкасси) пулчĕç.
Çак шкултах шашка вăййисене кăмăллакансем те пухăнчĕç. Ăмăртура Н.Индюков(Комсомольски) — пĕрремĕш, С.Зайцев (Хирти Сĕнтĕр) — иккĕмĕш, В.Смирнов (Кĕçĕн Каçал) виççĕмĕш вырăнсене çĕнсе илчĕç.
Хоккей площадкинче те спортсменсем вăй виçрĕç. Унта аслăрах çулсенчисемпе çамрăксем тупăшрĕç. Вăйăра ветерансем çĕнтерчĕç, вĕсем кубок хуçисем пулса тăчĕç.
Пур ăмăртусенчи çĕнтерÿçĕсем те Хисеп грамотисене тата хаклă парнесене тивĕçрĕç.
Уяв район çыннисене хаваслăх кÿчĕ. Унта чылай çын хутшăнса савăнчĕ. Ĕçленипе çеç мар, канма та пĕлмелле.
Источник: "Каçал Ен"