05 марта 2011 г.
Хаçат редакцине район çыннисем шăнкăравласа е çырусемпе шухăшĕсене пĕлтереççĕ е пĕр-пĕр ыйтупа пулăшма ыйтаççĕ. Хăйсене пăшăрхантаракан, тарăхтаракан пулăмсем пирки те каласа, çырса параççĕ. Пире шанни савăнтарать, май килнĕ таран çынсене усă тăвас, уçăмлăх кĕртес килет.
Акă февраль уйăхĕнче Галина Кокоревăран çакнашкал çыру илтĕмĕр. Унта вăл февралĕн 9-мĕшĕнче Комсомольски 1-мĕш вăтам шкулĕн спорт залĕнче иртнĕ волейбол вăййи çинчен çырать (кĕскен пичетлетпĕр). «Çав кун аслă классенче вĕренекен хĕрсем тупăшрĕç. Комсомольски 1-мĕш тата 2-мĕш шкулĕсен командисем финала тухрĕç. 3-мĕш парти вылянă чухне С.Остапиенко судья тĕрĕс мар хак пачĕ, вăййа 1-мĕш шкул команди майлă хакларĕ. Курса ларакансем те (çак шкултисем) лару-тăрăва çивĕчлетме пулăшрĕç. Площадкăра вĕрентÿ пайĕн специалисчĕ Е.А.Тихонов пурччĕ. Матча выляса пĕтермесĕрех командăри хĕрсем пăрахса тухса кайрĕç. Вĕсен кăмăлĕсем хуçăлчĕç»,— пĕлтерет çырура Галина Петровна.
Вăйăри лару-тăрăва уçăмлатас тĕллевпе çырăва Е.Тихонова тата район администрацине ярса патăмăр. Район администрацийĕн пуçлăхĕ Г.Ф.Волков çапла хурав пачĕ: «Вăйăра судья çеç хак пама, йышăнусем тума пултарать. Е.А.Тихоновăн унта хутшăнма май та, ирĕк те çук. Курса ларакансемшĕн вара яланах вĕсен çывăх çынни е ачи лайăхрах вылянă пек туйăнать».
Хăйĕн шухăшĕсене Евгений Аркадьевич та пĕлтерчĕ. «2011 çулта иртекен волейбол турнирĕ çине пысăк тимлĕх уйăрни савăнтарать. Болельщиксен йышĕнче ашшĕ-амăшĕсем те пурри вара пысăкрах çитĕнÿсем тăвас шанăç кÿрет.
Ача-пăча коллективĕнчи микроклимат мĕнле пуласси тренертан, физкультура учителĕнчен нумай килет. Волейбол вара – ушкăнпа вылямалли вăйă. Çамрăксене вăйă техникине хăнăхтарнипе пĕрлех выляса янине тивĕçлипе йышăнма, йăнăшсене тÿрлетме, малашлăх валли пĕтĕмлетÿсем тума та вĕрентмелле. Ун чухне спортсменсем выляса янă хыççăн пĕр-пĕринпе те хирĕçмĕç, судьясем çинчен темтепĕр калаçса-çырса та çÿремĕç. Вăййа выляса пĕтермесĕрех площадкăран тухса кайни те 2-мĕш вăтам шкул командине илем кÿмест.
С.В.Остапиенко 2010 çулта Шупашкар хулинче волейбол судйисен курсне пĕтернĕ, Чăваш Республикин волейболла выляса мала тухассишĕн пыракан ăмăртăвĕсенче те ăнăçлă ĕçлет. Халиччен ун пирки спортсменсенчен те, ЧР волейбол федерацийĕ енчен те ÿпкев сăмахĕсем илтмен»,— тенĕ пире янă çырура.
Хамăртан хушса çакна çеç калас килет: спортри çитĕнÿсем командăри кашни çынран килеççĕ. Çавăнпа ушкăнра килĕшÿлĕх кирлĕ, педагог, воспитатель çеç ачасене куллен кун çакна хăнăхтарса пыма пултарать. Хирĕçле вылякан командăсене хисеплеме вĕренни те пысăк пĕлтерĕшлĕ. Судьясене те яланах тĕрĕс те объективлă хак пама сĕннĕ пулăттăмăр. Çак ыйтăва кашни коллективрах сÿтсе явасса, кун пек проблема район шайĕнче урăх çĕкленмессе шанас килет.
Источник: "Каçал Ен"