05 марта 2011 г.
Çитĕнекен ăрăва тăван халăх еткерĕпе паллаштарас тата чăваш тĕррисене эрешлеме хăнăхтарас, вĕсене упраса хăварас тĕллевпе иртнĕ кунсенче тĕп хуламăрта Чăваш Республикин Халăх пултарулăх çуртĕнче курав ирттернĕ. Ăна «Шăхаль тĕррисем» ят панă. Унта ĕçсене тăратнă тĕп ăста – Йÿç Шăхалĕнчи культура çурчĕн директорĕ Людмила Козлова.
Вăл пуçарнипе культура çурчĕ çумĕнче алă ăстисен кружокĕ ĕçлет. Унта çÿрекенсем вара Людмила Степановна вĕрентнипе вĕтĕ шăрçапа эрешлеççĕ, тĕрлеççĕ, тухьясемпе хушпусем, мăй çыххисем ăсталаççĕ.
Иртнĕ курава чăваш наци тумĕпе эрешĕсене – хушпу, тухья, масмак, тевет тата ыттине тăратнă. Çавăн пекех кунта вĕтĕ шăрçапа эрешлеме вĕренекенсен ĕçĕсем те пур.
Ялти Культура çурчĕ çумĕнчи ал ăстисен кружокне «Улахра» ят панă. Çур çул ытла ĕçлет вăл. Эрнере виçĕ хутчен пулаççĕ кунта ăсталăха парăннисем. Каçхине пиллĕкпе çиччĕччен ачасем, каярахпа вара, ĕнесем сусан, аслисем пухăнаççĕ.
— Пурте пысăк хавхаланупа пуçтарăнатпăр. Ал ăсталăхне вĕренес текен çын яланах вăхăт тупать. Çемйипех пыракансем те чылай. Акă Галинăпа Анатолий Даниловсем виççĕри Рома ывăлĕпе çÿреççĕ. «Победа» ЯХПК председателĕ Владимир Ефремов та мăшăрĕпе Валентинăпа тата ачисемпе — Машăпа, Алешăпа кружока çÿреççĕ. Çавăн пекех Носковсем те, Шагаровсем те ачисемпе килеççĕ. Ман шутпа, çакă ачасене пĕчĕкренех тăван культурăпа, чăваш йăли-йĕркипе паллашма пулăшать,— терĕ Л.Козлова.
Чăннипех те пултаруллă çынсем пирĕн тăрăхра пулни савăнтарать те, мăнаçлантарать те.
Источник: "Каçал Ен"