02 марта 2011 г.
Паянхи кун телевизор пăхатăн-и, радио итлетĕн-и, хаçат-журнал вулатăн-и — пурте тенĕ пекех çут çанталăк катаклизмĕ, терроризм хăрушлăхĕ пирки пĕлтереççĕ. Çавăнпа та çак ыйту пĕлтерĕшлисенчен пĕри тесех калама пулать. Асăрханмалла, ку тĕлĕшпе вăхăтра кирлĕ йышăнусем тумалла текен шухăш палăрчĕ нумаях пулмасть районти гражданла оборона тата чрезвычайлă лару-тăру службин канашлăвĕнче. Унта ял поселенийĕсен пуçлăхĕсем, предприятисемпе организацисен, учрежденисен ертÿçисем иртнĕ çулхи ĕç-хĕле пĕтĕмлетме пуçтарăнчĕç. Районта гражданла оборона тата чрезвычайлă лару-тăру енĕпе ĕçлекен Н.А.Хайруллов специалист-эксперт тĕплĕ доклад туса пачĕ. Çул çинчи хăрушсăрлăх ыйтăвĕсем çинче ГИБДД уйрăмĕн районти начальникĕ Н.А.Райков сăмах илчĕ. «Сыснасен африка чуми те пысăк хăрушлăх кăларса тăратма пултарать»,— пĕлтерчĕ районти ветеринари станцийĕн тĕп врачĕ Р.М.Велимухаметов. Вăл Чулхула облаçĕнче çак чир пуррине, пирĕн пата ан килтĕр тесе асăрханмалли ĕçсене палăртрĕ. Канашлу ĕçне район администрацийĕн пуçлăхĕ Г.Ф.Волков ертсе пычĕ. Чăваш Республикинчи Чрезвычайлă службăн председателĕн çумĕ О.Е.Павлов тата РФ МЧСăн Чăваш Енпе ĕçлекен Тĕп управленийĕн начальникĕн пĕрремĕш çумĕ Г.Е.Михайлов хутшăнчĕç, хăйсен шухăшĕсене пĕлтерчĕç, канашсем пачĕç.
Источник: "Каçал Ен"