26 февраля 2011 г.
Кашни ир район администрацийĕн çурчĕ умĕнче шăпăрпа е кĕреçепе ĕçлекен çынна курма пулать. Çил-тăман алхасать-и, шартлама сивĕ-и, çерçи пуçĕ пысăкăш юр çăвать-и — вăл яланах ĕçре. Акă ĕнер Н.Г.Петровпа курса калаçрăм.
Пурне те сывлăх сунма тăрăшать Николай Германович. «Çанталăкĕ те кăçал тĕлĕнтерет: кашни кун тенĕ пекех юр çăвать, тасатма кăна ĕлкĕр»,— сăмахларĕ яваплăха туйса ĕçлекен дворник.
Н.Г.Петров Çĕнĕ Шăхран ялĕнче çуралса ÿснĕ. Тăван ялта 8 класс пĕтерсен, Сĕнтĕрвăрринчи 11-мĕш номерлĕ професси училищине вĕренме кĕрет. Ăна ăнăçлă вĕренсе тухса алла столяр-мебельщик дипломне илет.
Н.Петрова малалла шăпа Омск хулине илсе çитерет. Темиçе уйăхран, каялла тăван яла таврăнсан, çар ретне тăма повестка илет. 2 çул ытла пирĕн ентеш Германи çĕрĕ çинче службăра тăрать.
«Аякра та чăваш ятне яман, яланах дисциплинăллă çар çынни пулма тăрăшнă. Спорт тата физкультура енĕпе лайăх кăтартусем тунăшăн кăкăр тулли паллăсем парса чысларĕç»,— пĕлтерчĕ çар пурнăçне аса илсе мана Коля тете.
1972 çулта Николай Петров «Комсомольский» совхозра водительте ĕçлеме пикенет. Хастар çын комбайнерта та, трактористра та чылай çул тăрăшать.
Вăл 1974 çулта Хырай Ĕнел хĕрĕпе, Ираида Германовна Зайцевăпа, çемье çавăрать. 6 ача çуратса çитĕнтернĕ Петровсем, пурне те пурнăç çулĕ çине кăларнă.
Ираида Германовнăпа Николай Германовича 7 мăнук савăнтарать.
Источник: "Каçал Ен"