22 февраля 2011 г.
Тукай каччи Андрей Козлов Алтай крайĕнче икĕ çул пограничникре хĕсметре тăнă. Хăйĕн çар тивĕçне çÿлти шайра пурнăçласан, тăван яла таврăнать, «Рассвет» хуçалăхра вăй хурать. Те пĕчĕкренех çар тумне килĕштернĕрен, те кинофильмсенче милиционерсен ĕçне курнипе, чун туртăмĕ ăна районти шалти ĕçсен пайне илсе çитерет. Аслă сержант 2005 çултанпа патрульпе пост службинче водительте ĕçлеме пикенет. Андрей Николаевич çамрăксемшĕн яланах ырă тĕслĕх. Ĕçĕ те канăçсăр вĕсен, ирĕн-каçăн саккун хуралĕнче тăраканскерсен.
Азат Солдатов вара — районти шалти ĕçсен пайĕнче 2008 çултанпа. Вăл Шăнкăртам ялĕнче çуралса ÿснĕ. Вăтам шкултан вĕренсе тухсан çар ретне тăнă, Казахстан çĕрĕ çинче стратегиллĕ пĕлтерĕшлĕ чаçре службăра тăнă. Хĕсметрен таврăнсан водителе вĕренсе тухать, тăван хуçалăхра тăрăшать.
Вăл паянхи кун — оперативлă помощникăн пулăшаканĕ.
Пултаруллă сотрудниксене хастарлăхшăн, тивĕçсене çÿлти шайра пурнăçланăшăн районти шалти ĕçсен пайĕн тата район администрацийĕн Хисеп грамотисемпе чылай хутчен наградăланă.
Азат Фердинадович куçăмсăр майпа Шупашкарти коопераци техникумĕнче юридици факультетĕнче вĕренет.
— Кирек хăш салтакăн та генерал пулма ĕмĕтленмелле. Кăçал алла вăтам специалистăн дипломне илсен, малалла аслă вĕренÿ заведенине кайма ăнтăлатăп. Офицер званине илес ĕмĕт пур,— пĕлтерчĕ хăйĕн шухăш-кăмăлне малашлăх пирки шутлакан милици сержанчĕ.
Пакунлă çыннăн çемйинче ăнлану хуçаланать, малашне те çаплах пултăр. Мĕншĕн тесен милици сотрудникĕн ĕç кунĕ нормăпа мар çке-ха.
Источник: "Каçал Ен"