16 февраля 2011 г.
Иртнĕ вырсарни кун Пĕтĕм Раççейри ХХIХ «Раççей йĕлтĕр йĕрĕ — 2011» ăмăрту пулчĕ. Мероприяти район территорийĕнче анлă иртрĕ. Кашни ял поселенийĕ вырăнта ăмăртусем йĕркелерĕ. Район центрĕнче пурăнакансем вара Комсомольскинчи вăрман хĕррине васкарĕç.
Çак кун спорта юратакансене сивĕ çил вĕрни те хăратмарĕ. Кунта ватти те, вĕтти те чылайăн пухăнчĕç. Старта тăнисем тулли кăмăлпа ярăнса савăнчĕç, сывлăхне çирĕплетрĕç, пĕр-пĕринпе курса калаçрĕç.
Чи малтанах çак мероприятие пуçтарăннисене район администрацийĕн пуçлăхĕ Геннадий Волков ăшшăн саламларĕ, малашне те спорта юратма ырлăх-сывлăх сунчĕ. Ун хыççăн вара ЧР конкурентлă политика тата тарифсен патшалăх службин ертÿçин çумĕ Роза Лебедева, Комсомольски ял поселенийĕн пуçлăхĕ Петр Силивестров тата ыттисем те калаçрĕç.
Кашни çул иртекен çак спорт мероприятийĕ уява çаврăннă тесен те юрать. «Раççей йĕлтĕр йĕрне» профессионалсем те, ветерансем те, сывă пурнăç йĕркине килĕштерекенсем те, хăшĕ-пĕри вара çемйипех хутшăнма тăрăшаççĕ.
Уява культурăпа кану центрĕн ĕçченĕсем хутшăнса савăк кĕвĕ янăратни сивĕре кăмăла çĕклерĕ.
Йĕлтĕрçĕсем хушшинче тупăшу чăнах та хĕрÿ иртрĕ. Хĕр-арăмсенчен пĕрремĕшпе иккĕмĕш вырăнсене Комсомольски 1-мĕш вăтам шкулĕн вĕрентекенĕсем Ирина Соловьевăпа Елена Сереброва йышăнчĕç. Виççĕмĕш вырăна РФ Пенси фончĕн районти управленийĕн специалисчĕ Марина Шашкина çĕнсе илчĕ. Хĕр ачасенчен Комсомольски 1-мĕш вăтам шкулĕнче пĕлÿ пухакан Олесьăпа Линда Тихоновăсем, Марина Биктимирова палăрчĕç.
Виçĕ километрлă дистанцие арçынсенчен Валерий Гришин пĕрремĕш, Александр Архипов иккĕмĕш, Владимир Гордеев виççĕмĕш чупса тухрĕç. Арçын ачасенчен Комсомольски 1-мĕш вăтам шкулĕн вĕренекенĕсем Стас Шкаблев, Геннадий Павлов тата Иван Степанов чи маттуррисем пулчĕç.
Спорт ветеранĕсем хушшинче те ăмăрту хĕрÿ иртрĕ. Çивĕч кĕрешÿре Василий Пундяков пĕрремĕш, Александр Горбуновпа Юрий Зубарев иккĕмĕшпе виççĕмĕш вырăнсене тухрĕç.
«Чи аслă йĕлтĕрçĕ», «Чи çамрăк йĕлтĕрçĕ» ятсене 89 çулхи Ревокат Прохорович Моисеев, Кирилл Денисов тивĕçрĕç.
Комсомольски 2-мĕш вăтам шкулĕн спортсменĕсем вăхăтра çитеймерĕç, çавна пула пĕрлехи ăмăртăва хутшăнаймарĕç.
Спорта тата физкультурăна юратакансем вăрман уçланкинчен çĕкленÿллĕ кăмăлпа таврăнчĕç, уçă та таса сывлăшра пулса çĕнĕ кун валли вăй пухрĕç.
АСАНКАССИ. Нарăс уйăхĕн 13-мĕшĕнче Асанкасси ял поселенийĕн территорийĕнче пурăнакансем те вăрман хĕррине чылайăн пухăнчĕç. Çил-тăман алхаснине пăхмасăрах шкул ачисем те, вĕрентекенсем те старта тухрĕç.
Сăмахран, Герасимовсем çемйипех чупăва хутшăнчĕç. 1-мĕш класра вĕренекен Женя та ашшĕпе амăшĕнчен, пиччĕшĕнчен юлмарĕ. Вăл чупакансенчен чи кĕçĕнни пулчĕ. Мала тухнисене ял поселенийĕн пуçлăхĕ Н.Н.Карпов парнесем парса хавхалантарчĕ.
Çак кун чылай çын йĕлтĕр çине тăрса сывлăхне çирĕплетрĕ.
АЛЕКСАНДРОВКА. Александровка ял поселенийĕн территорийĕнче пурăнакансем те «Раççей йĕлтĕр йĕрĕ — 2011» ăмăртăва активлă хутшăннă. Чи малтанах спортсменсене чупура ăнăçу сунса Т.И.Волкова физкультура учителĕ тухса калаçнă. «Спортпа физкультура — сывлăх никĕсĕ. Вĕсем кашни çыншăн, çемьешĕн чи кирли пулччăр»,— тенĕ Александровка ял поселенийĕн пуçлăхĕ В.Ф.Волков.
Старта 40 ытла йĕлтĕрçĕ тухнă. Хĕрарăмсем хушшинче чи маттурри Любовь Полякова пулнă, вăл дистанцие пĕрремĕш чупса тухнă. Иккĕмĕш вырăна Ирина Воробьева йышăннă. Арçынсенчен чи пултарулли — математика тата физика предмечĕсемпе вĕрентекен Владимир Воронов.
1—5-мĕш классенчи хĕр ачасенчен Анастасия Миговорова, арçын ачасенчен Александр Ананьев пĕрремĕш чупса тухнă.
6—9-мĕш классенче вĕренекенсенчен Евгения Лукинапа Игорь Ефимова çитекенни пулман.
Çĕнтерÿçĕсене Александровка тĕп шкулĕн директорĕ А.В.Пудовкин Хисеп грамотисем тата парнесем парса чысланă.
ШУРУТ. Шурут ял поселенийĕн ĕçченĕсем тата вăтам шкул учителĕсем те «Раççей йĕлтĕр йĕрĕ — 2011» уява пуçтарăннă. Ăна физкультура учителĕ Петр Козлов йĕркелесе ертсе пынă. Вăл 52 спортсмена уяв ячĕпе саламланă, ăмăрту йĕркипе паллаштарнă.
Пухăннисене ăнăçу сунса Галина Архипова тата Татьяна Козлова сăмах тухса каланă.
«Чи аслă йĕлтĕрçĕ» ята Ф.Алимова (Тутар Шурут) тивĕçнĕ.
НĔРКЕÇ. Февралĕн 13-мĕшĕнче Нĕркеç вăтам шкулĕн территорийĕнче спорта тата сывă пурнăç йĕркине килĕштерекенсем пухăннă. Чи малтанах Хирти Сĕнтĕр ял поселенийĕн пуçлăхĕ Геннадий Ефремов сăмах каланă.
Ăмăртура Виктор Прокопьев, Кристина Кошкина, Никита Голландцев, Вика Воронова, Никита Волков, Наталия Можаева, Владимир Кошкин, Оксана Кошкина тата ыттисем те палăрнă.
«Чи аслă йĕлтĕрçĕ», «Чи çамрăк йĕлтĕрçĕ» ятсене Алексей Волковпа Данил Кошкин тивĕçнĕ. VIP-чупура Николай Иванович Васильев çĕнтерÿçĕ пулнă. Вĕсене пурне те парнесем парса чысланă.
Источник: "Каçал Ен"